Gonzalo Caballero pide a todos os progresistas que non queden en casa o 12X: "Somos máis e temos mellores ideas"

O candidato do PSdeG ás eleccións autonómicas, Gonzalo Caballero, pediu a todos os progresistas que "non queden en casa" o vindeiro domingo e acudan a votar convencido de que o "cambio é posible" se hai mobilización.

"Temos que dar un paso adiante, non nos podemos quedar en casa. Temos a forza, a capacidade, somos máis e temos mellores ideas", manifestou o candidato socialista nun mitin en Ferrol xunto á vicesecretaria xeral do PSOE, Adriana Lastra.

No seu discurso nun acto ao aire libre no que os asistentes tiveron que tomarse a temperatura para acceder ao recinto acoutado, o líder do PSdeG asegurou encarar a recta final "coas pilas postas". "Non vou parar de aquí ao domingo", avisou.

O xefe de filas dos socialistas galegos animou os seus a mobilizar a cidadanía para que o 12X acuda ás urnas fronte a unha dereita que "non quere que os progresistas vaian votar". "A Galicia, Galicia, Galicia que repite Feijóo, esa que cre que é da súa propiedade, témoslle que dicir que Galicia non é do PP, que é dos galegos e galegas", expresou.

Ademais, o socialista, que presentou o seu proxecto para "gobernar a favor de todos os galegos" e non "en contra de ninguén", avogou por "empezar a reescribir a historia de Galicia en cor" tras "once anos en branco e negro" con Feijóo

Para iso, defendeu a necesidade dun goberno progresista en Galicia para pilotar unha recuperación na que "ninguén quede atrás" fronte a un PP que nos seus once anos de goberno en Galicia optou polo modelo da "privatización".

Tamén se comprometeu a ser un "aliado" de Ferrol desde a Xunta de Galicia tras o que cualificou de "década perdida" para a cidade cos gobernos do PP.