A etarra 'Anboto' nega ordenar o asasinato do comandante galego Luciano Cortizo en 1995
O ex xefe de ETA 'Mikel Antza', parella da acusada, asiste como público ao xuízo na Audiencia Nacional.
Por Europa Press / Redacción | SANTIAGO DE COMPOSTELA | 08/07/2020 | Actualizada ás 15:30
A ex xefa de ETA María Soledad Iparragirre, alias 'Anboto', negou este mércores dar a orde ou prestar apoio no asasinato cun coche bomba do comandante do Exército de Terra Luciano Cortizo --natural da Rúa-- en León en decembro de 1995, atentado no que resultou ferida de gravidade a filla deste.
Así o manifestou Iparragirre no primeiro xuízo contra ela na Audiencia Nacional, dos 12 que ten pendentes, despois de que fose entregada por Francia no outono de 2019 unha vez cumpriu alí condena de prisión por integración en asociación de malfeitores.
As acusacións --Fiscalía, a Asociación de Vítimas do Terrorismo (AVT) como acusación popular e a familia como acusación particular-- piden para a etarra 122 anos de cárcere polo atentado contra Cortizo, xa que a sitúan como a dirixente da organización terrorista que daría a orde expresa de asasinalo, ao asumir un ano antes do crime a dirección dos comandos 'legais' da banda aos que daba as instrucións concretas respecto dos obxectivos.
"Con todos os meus respectos, vou contestar só ás preguntas da defensa", dixo despois de que a presidenta do tribunal, a maxistrada Concepción Espejel, lle preguntase se quería prestar declaración.
UN EX XEFE DE ETA ENTRE O PÚBLICO
A etarra compareceu desde unha sala blindada e ao xuízo asistiu como público o que fora o máximo dirixente da banda terrorista durante 12 anos e a súa parella Mikel Albisu, alias 'Mikel Antza'.
Ambos foron detidos en Francia en outubro de 2004 e en decembro de 2010 foron condenados a 20 anos de prisión pola súa pertenza a ETA. 'Mikel Antza' foi entregado a España polas autoridades galas en xaneiro de 2019 e a Policía Nacional constatou que non tiña causas pendentes coa xustiza, polo que desde entón está en liberdade.
Durante os primeiros minutos do xuízo contra 'Anboto', esta negou dar ningunha orde, instrución ou apoio para cometer o atentado contra o comandante Cortizo. "En absoluto", respondeu a etarra ao seu avogado. Á pregunta de como explica que haxa varios detidos que a identifican como a xefa dos comandos legais de ETA, 'Anboto' limitouse a responder que pola súa "experiencia" esas declaracións non se fan de forma "voluntaria".
O CORPO ESTABA A VARIOS METROS DO COCHE
Despois da acusada, compareceron por videoconferencia varios policías nacionais que estiveron no lugar dos feitos e que contaron que cando chegaron á zona do atentado viron o coche do comandante "esnaquizado" e un corpo que xacía a varios metros.
Tamén declararon desde os respectivos cárceres onde cumpren condena os tamén etarras Ibon Etxezarreta e Agustín Almaraz, quen en 1995 integraban a organización terrorista. A pesar de que ambos sinalaran en sede xudicial á ex xefa de ETA, no xuízo deste mércores ningún corroborou esta versión que xa prestaron. Etxezarreta e Almaraz alegaron que pasaron 25 anos do atentado e que non lembran quen daba as ordes e nin sequera se unha desas persoas era unha muller, a pesar das insistentes preguntas do fiscal José Perals e da avogada da acusación particular Carmen Ladrón de Guevara.
Almaraz dixo que era a "dirección", en xenérico, a que daba as ordes para atentar e a que lles facilitaba os explosivos ou os "cursos" para aprender a fabricar e utilizar artefactos. Con todo, nun momento dado a letrada preguntoulle se 'Anboto' era a xefa dos comandos legais, ao que contestou que "posiblemente", e tras lembrarlle que a identificou nunha foto, respondeu que "se iso pon na declaración...".
O xuízo continuará este xoves coas declaracións periciais, nas que se explicará o rexistro do piso do tamén etarra Sergio Polo en Pasajes de San Pedro (Guipúzcoa), onde se interveu unha comunicación orgánica asinada por 'Anboto' na que manifestaba o seu desexo dun atentado, segundo os escritos de acusación. A data de redacción non se coñece de forma exacta, pero que se calcula entre os meses de novembro e decembro de 1995.
Os investigadores tamén acharon unha pistola FN Browning Modelo G35 con numero de serie borrado, cinco artefactos explosivos xa elaborados integrados por recipientes tupperware de plástico, explosivo amonal, detonadores, sustancias usadas por ETA nos seus artefactos explosivos, dispositivos de iniciación, e un documento titulado 'TUPPER explosivo' confeccionado a computador e redactado en castelán con detalles sobre fabricación e colocación de explosivos, entre outros materiais.
