Por E.P. | Pontevedra | 10/07/2020 | Actualizada ás 17:03
A presidenta da Deputación de Pontevedra, Carmela Silva, anunciou que a Administración provincial elaborará un informe sobre o risco de que as mulleres volvan quedar invisibilizadas a raíz do fomento do teletraballo polo impacto do coronavirus.
"As mulleres corren o perigo de que as volvan meter en casa", afirma Carmela Silva, se non se lexisla unha normativa que atenda ás súas necesidades para evitar que sexan invisibilizadas.
A mandataria provincial sostén que hai que impedir que esta nova ferramenta tecnolóxica poida converterse nun elemento de involución para as conquistas laborais, sociais e persoais das mulleres.
Por estas razóns, Carmela Silva anunciou que a Deputación Provincial elaborará un informe que trasladará á Federación Galega de Municipios e Provincias, á Xunta de Galicia, ao Goberno do Estado e aos Parlamentos de Galicia e de España para demandar que se teña en conta ás mulleres á hora de elaborar unha lei que regule o teletrabajo.
A máxima representante provincial expuxo os datos obtidos polo colectivo Malasmadres nunha enquisa na que 8 de cada 10 mulleres recoñecen que non poden equilibrar a súa vida laboral coa súa actividade de coidados e por este motivo, 6 de cada 10 enquisadas recoñecían que renuncian á súa actividade profesional. E nese cuestionario, as mulleres manifestaron que só contan cunha media de 54 minutos ao día para o seu tempo libre. "Traballamos todo o día", afirmou Silva.
A enquisa tamén demostra que unha muller con emprego dedica máis tempo a tarefas de coidado no ámbito familiar que os homes que se atopan desempregados.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.