Por Europa Press / Redacción | SANTIAGO DE COMPOSTELA | 17/07/2020 | Actualizada ás 12:01
A pandemia vén de poñer de manifesto a debilidade da industria galega, unha debilidade que queda patente nas cifras publicadas esta mañá polo INE. Segundo afirma o instituto público, as vendas da industria esborralláronse un 39,9% en maio en Galicia en comparación co mesmo mes do ano anterior.
Esta cifra, se ben é máis moderada que o 48,3% de caída rexistrado en abril, supón unha vez máis o segundo maior esborralle a nivel nacional, só por baixo de Baleares (42,1%) e máis de seis puntos por encima da media nacional (33,1%).
A raíz do impacto do coronavirus na actividade económica, en Galicia prodúcense tres descensos interanuais consecutivos --marzo, abril e maio--, tras os incrementos de xaneiro e febreiro cos que se comezou o ano. No acumulado do ano, entre xaneiro e maio prodúcese unha diminución do 18,3%, lixeiramente por riba da media nacional (do 18,1%).
Corrixido o efecto calendario e a estacionalidade, a cifra de negocios da industria baixou un 29,3% interanual no quinto mes do ano, fronte ao retroceso do 40,8% de abril, que foi o maior da serie.
Os datos de destrución económica son lixeiramente máis benignos no caso do sector servizos, que segundo publica esta mañá o INE rexistrou un descenso da súa facturación do 29,8 no mes de maio, se ben se trata dunha cifra máis moderada que o 43,6% de caída que se produciu no mes de abril, a maior de toda a serie histórica.
Con todo, e segundo o organismo público, a facturación do sector servizos caeu menos que a media do estado, que foi do 33,6%. As cifras de España tamén amosan unha ralentización con respecto ás baixadas vertixinosas do cuarto mes do ano. Pola súa banda, a ocupación diminuíu un 6,5% en Galicia durante o quinto mes do ano, e iso sen contabilizar as persoas en ERTE.
LENE REAPERTURA
Con este descenso, os servizos encadean tres meses consecutivos de fortes retrocesos interanuais como consecuencia da pandemia e os seus efectos sobre a economía.
O INE lembra que desde o 4 de maio, de acordo co plan para a transición cara a nova normalidade, os locais comerciais que non tiñan permitida a venda ao público foron reabrindo as súas portas e adaptando os seus aforamentos. Desta forma, hoteis, establecementos turísticos e actividades de restauración puideron abrir ao público con certas restricións conforme os distintos territorios foron alcanzando as diferentes fases da desescalada.
Esta reactivación motivou que a facturación do sector servizos repuntara en maio un 15,5% respecto ao mes de abril (sen efectos estacionales e de calendario), destacando os fortes avances da venda e reparación de vehículos e automóbiles (+198,3%) e da hostalaría (+128,8%).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.