O Concello da Coruña iniciará "accións xudiciais" para recuperar a Casa Cornide de mans da familia Franco

A alcaldesa da Coruña, Inés Rey, anunciou que o Concello iniciará "accións xudiciais" para reclamar a propiedade da Casa Cornide, actualmente en mans dos Franco. Na presentación do informe histórico sobre a poxa do inmoble, a rexedora defendeu que a familia a conseguiu "de maneira fraudulenta".

Este documento é, segundo apuntou Rey, "unha das patas" para a recuperación do inmoble situado na Cidade Vella e a outra sería a análise histórico artística, que xa está en elaboración, e que busca que se declare como Ben de Interese Cultural (BIC). "Cando teñamos o informe iniciaremos as accións xudiciais pertinentes para a recuperación da casa", resaltou.

Aínda que non marcou prazos, considera que o documento pendente de finalización estará listo "en cuestión de meses". Sobre a influencia da sentenza do caso do Pazo de Meirás, Rey admitiu que podería ser "indicativo dos argumentos dunha parte ou outra", pero reafirmouse en que a vía xudicial abrirase "con independencia do resultado".

A alcaldesa cualificou o estudo presentado esta mañá de "formidable". Segundo Rey, a permuta e poxa do edificio foi un "proceso que tramaron od Franco para facerse cun ben da cidade". Un comportamento, dixo, "habitual" na familia do ditador durante unha época que tachou de "escura, de represalias, medo e terror".

VALOR DO INMOBLE

O director do equipo redactor do informe, Emilio Grandío, explicou que o estudo constata que houbo unha redución no prezo de venda da Casa Cornide dun 1.200% con respecto ao valor inicial na poxa, celebrada en 1962. Esta cantidade era de 344.000 pesetas e o edificio adxudicouse ao banqueiro Pedro Barrié da Maza por 305.000.

Días despois da poxa, o empresario vendeu o inmoble á muller de Franco, Carmen Polo, por 25.000 pesetas. Ademais, a rexedora apuntou que o documento avala que ata o ano 1976 realizáronse obras por parte do Concello, "algo que non entraba nas súas competencias porque xa estaba en mans privadas".

Grandío repasou a historia do inmoble explicando que o alcalde Alfonso Molina decidira instalar alí o conservatorio de música nos anos 50 pero, pouco despois, proxectouno noutro lugar e, tras a permuta, organizouse a poxa. "A relación de Franco coa Coruña era polo pazo de Meirás, pero Carmen Polo tiña presenza na cidade, unha relación moi estreita", advertiu.

O historiador resaltou que existe "unha opacidade informativa absoluta do tema", o que relaciona con que a ditadura "controlaba todo, sobre todo a información". O estudo foi encargado polo concello ao Instituto de Estudos Coruñeses José Cornide.