Dous casos positivos de coronavirus en Barbadás poñen en corentena a 23 contactos
Trátase de dous mozos, procedentes do País Vasco, que se atopan xa illados a domicilio e con sintomatoloxía leve.
Por Europa Press / Redacción | Ourense | 24/07/2020 | Actualizada ás 15:51
A detección de dous novos casos positivos de Covid-19 no concello de Barbadás (Ourense) obrigou a pór en corentena de 14 días a 23 persoas identificadas polo equipo de rastreadores do Sergas por manter contacto directo cos afectados.
Os dous mozos positivos, procedentes do País Vasco, atópanse xa en "illamento domiciliario e con sintomatoloxía leve", segundo confirmaron fontes sanitarias.
Por mor da confirmación destes dous novos casos positivos o Sergas puxo en marcha o protocolo de seguimento dos seus contactos estreitos que identificou, ata o momento, ás 23 persoas postas en corentena.
Ao longo desta tarde, un equipo de profesionais procederá á realización das probas diagnosticadas indicadas seguindo os protocolos en vigor.
Estes dous novos casos aumentan a cinco o número de persoas a seguimento domiciliario na provincia de Ourense e mantense nun o número de ingresados no Hospital Universitario de Ourense (CHUO).
