O BNG sobe en intención de voto, segundo o CIS

O Bloque Nacionalista Galego (BNG) subiu, nos últimos 15 días, outra décima en estimación de voto e alcanza o 0,8 por cento, segundo o barómetro do Centro de Investigacións Sociolóxicas (CIS) publicado este luns.

Esta enquisa realizouse apenas dúas semanas despois da anterior, na que o BNG obtivo un 0,7 por cento en estimación de voto e levou a cabo desde o 9 de xullo --final da campaña electoral-- ata o 19, sete días despois da cita coas urnas o domingo 12 de xullo, na que o BNG se fixo con 19 escanos e situouse como segunda forza política.

Así, levou a cabo practicamente na súa totalidade despois de que o PP de Alberto Núñez Feijóo revalidase a súa cuarta maioría absoluta consecutiva e obtivese 42 escanos --sumado xa o voto emigrante--, fronte aos 19 do BNG e os 14 cos que se quedou finalmente o PSdeG.

Na nova sondaxe publicada este luns, o CIS outorga ao PSOE unha vantaxe sobre o PP en intención de voto de 13 puntos, dous máis que no barómetro que o centro demoscópico difundiu o pasado 15 de xullo, e a máxima desde as eleccións xerais de novembro de 2019.

O organismo que preside José Félix Tezanos incluíu estes datos de estimación de voto na enquisa sobre 'Opinión Pública e Política Fiscal'. Para este traballo sobre política fiscal entrevistouse a 2.926 persoas.

Así as cousas, o novo estudo outorga ao PSOE unha intención de voto do 32,4% --a súa mellor cota desde o pasado mes de outubro--, mentres que o PP retrocede do 21,2% ao 19,4% respecto ao barómetro, co que a distancia entre ambos amplíase ata 13 puntos, a maior nos estudos do CIS desde as xerais de novembro de 2019.

Unidas Podemos tamén aumentou o seu apoio, no seu caso en cinco décimas, ata o 12,6%, a súa mellor porcentaxe desde abril. Mentres o PP caía en 1,8 puntos, Vox crecía en sete décimas respecto de doce días antes e situábase cun apoio do 12,3%, pero sen chegar aínda ás súas cotas anteriores ao estalido da pandemia.

Ciudadanos apenas varía a súa cota respecto ao barómetro (8,7% agora fronte ao 8,8% do 15 de xullo). Se as eleccións fosen mañá, un 7% avanza que non votaría, fronte ao 12,7% que o declarou así na anterior enquisa.