Por Europa Press / Redacción | Santiago de Compostela | 27/07/2020 | Actualizada ás 19:24
A Sección Segunda da Sala do Contencioso-administrativo do Tribunal Superior de Xustiza de Galicia (TSXG) desestimou o recurso interposto polo Concello de Pontevedra no que pedía a revisión da autorización ambiental outorgada pola Xunta á fábrica de pasta de papel da empresa Ence situada en Lourizán.
Segundo informou o Concello de Pontevedra, o recurso foi interposto en setembro do ano 2018 contra a resolución da Dirección Xeral de Calidade Ambiental e Cambio Climático da Consellería de Medio Ambiente e Ordenación do Territorio da Xunta de Galicia.
O recurso municipal baseábase en que a resolución da Xunta na que revisaba a autorización ambiental produciuse contravindo o Plan de Ordenación do Litoral (POL), no que a Xunta ordenaba a recuperación ambiental deses terreos.
A sentenza do alto tribunal galego conclúe, con todo, que a data de 2018 que marcaba a Xunta de Galicia para devolver os terreos ao seu estado orixinal estaba vinculada á concesión outorgada polo Estado a Ence e que este prazo, sinalan os maxistrados, "mutou tras a ampliación concesional" aprobada polo Executivo en funcións que presidía Mariano Rajoy, que autorizou a continuidade da pasteira ata o ano 2073.
No fallo arguméntase que a aplicación da disposición do Plan de Ordenación do Litoral (POL) que avala a recuperación dos terreos de Lourizán "non pode interpretarse como de prazo vencido senón como un obxectivo de regular a recuperación do espazo concesional unha vez que a empresa codemandada abandone as instalacións".
Segundo informou a portavoz do goberno local de Pontevedra, a concelleira Carme Da Silva, o Concello sopesa a posibilidade de recorrer a sentenza, aínda que os servizos xurídicos desaconsellan presentarse ante o Tribunal Supremo. A administración municipal foi condenada, ademais, ao pago das costas do xuízo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.