Por Europa Press / Redacción | SANTIAGO DE COMPOSTELA | 29/07/2020 | Actualizada ás 15:09
O BNG pide á Xunta que se inclúa a Madrid na lista de territorios de maior incidencia de coronavirus, por ser a "orixe de moitos contagios importados". Ao tempo, reclamou que se exclúa aos traballadores transfronteirizos entre Galicia e Norte de Portugal do sistema de control de datos establecido polas autoridades autonómicas, xa que a situación nesta rexión lusa é similar á galega ou mellor.
Así, a través dun comunicado, trasladou este mércores a súa "preocupación" polos continuados rebrotes de coronavirus que se están coñecendo en Galicia e considera que a Xunta "non está a actuar coa necesaria dilixencia e seriedade". Igualmente, o BNG cre que algunhas das medidas adoptadas "parecen máis pensadas para conseguir un titular de prensa que en base á súa eficacia para evitar e controlar os novos casos de coronavirus".
A modo de exemplo, os nacionalistas sinalan a decisión de "impor como obrigatorio" que todas as persoas que proceden dun territorio considerado de alta incidencia do virus teñan que facilitar datos se figuran dunha listaxe de comunidades e países; unha medida que, a xuízo da portavoz sanitaria na pasada lexislatura, "non responde a criterios de racionalidade".
Neste sentido, a formación nacionalista "non atopa explicación" a que un país como Portugal figure na listaxe desde onde as persoas que cheguen de Galicia deben dar os seus datos e, con todo, non estea incluído Madrid, "a pesar de ser un territorio do que proceden moitos dos casos de contaxio importados".
Así o di porque, a pandemia no norte de Portugal, "está baixo control" segundo os cocientes que presenta. Por iso, reproba que a Xunta "obrigue aos traballadores transfronteirizos a ter que facilitar información e datos de contacto para ser incluídos no rexistro habilitado para tal función e pide que sexan excluídos desta obrigación".
A XUNTA, ANALIZANDO O CASO PORTUGUÉS
Este mesmo mércores o presidente da Xunta, Alberto Núñez Feijóo, avanzou que nos próximos días o conselleiro de Sanidade, Jesús Vázquez Almuiña, manterá reunións para avaliar a posibilidade de rexionalizar Portugal e incluír no protocolo de viaxeiros elaborado pola Xunta só as zonas con maior incidencia epidemiolóxica do país luso.
Aínda que no protocolo que obriga a comunicar estancias en zonas de risco non se fan diferenzas con respecto ao territorio dos países, excepto no caso do Estado, Feijóo trasladou a necesidade de establecer unha diferenciación por zonas de alta incidencia da COVID-19 tamén para o país veciño, ante os "estreitos lazos" que o unen con Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.