Detidas 10 persoas e incautadas máis de 2.000 plantas de marihuana no cultivo máis sofisticado achado en Galicia
A plantación, na localidade coruñesa de Aranga, tiña capacidade para producir 8.000 plantas ao ano, estaba dotada de tecnoloxía avanzada, valorada en máis de 60.000 euros.
Por Galicia Confidencial | Santiago de Compostela | 30/07/2020 | Actualizada ás 19:33
A Garda Civil desarticulou, tras varios meses de investigación, un dos grupos "máis activos" de Galicia dedicados ao cultivo e venda de marihuana, unha intervención que se saldou con 10 persoas detidas e máis de 2.000 plantas de marihuana intervidas na localidade coruñesa de Aranga.
Segundo informou a Garda Civil, xa no mes de febreiro procedeuse á detención en Culleredo do principal distribuidor de marihuana relacionado co grupo investigado, que foi interceptado cun quilo de cogollos preparados para a súa venda.
Posteriormente, no mes de xullo, procedeuse á detención doutra persona na localidade de Ordes, cando se dispuña a entregar un paquete con 250 gramos de cogollos de marihuana.
Finalmente, este martes concluíuse a operación coa detención de oito membros do grupo que foron sorprendidos in fraganti cando se dirixían a unha antiga nave porcina situada en Aranga para proceder ao corte e preparación de 600 plantas de marihuana.
Tras a detención, procedeuse ao rexistro domiciliario dos dous principais investigados, en Cerceda e Vilasantar, e de dúas naves nas localidades de Aranga e Cerceda.
Como resultado da operación, incautáronse unhas 2.000 plantas de marihuana, dous quilos de cogollos preparados para a súa venda e distribución, 3.210 euros en metálico, básculas de precisión e material informático, así como tres vehículos.
A Garda Civil apuntou que, até o momento, trátase do cultivo de marihuana máis sofisticado achado en Galicia. A plantación que tiña capacidade para producir 8.000 plantas ao ano, estaba dotada de tecnoloxía avanzada, valorada en máis de 60.000 euros.
