A Xunta creará a marca 'Leite de Pastoreo de Galicia'

A Xunta levará a cabo un estudo dos custos de produción das explotacións lácteas galegas e creará a marca 'Leite de Pastoreo de Galicia', dúas iniciativas enmarcas na Estratexia de dinamización do sector que impulsa a Consellería de Medio Rural e que coordina nos seus aspectos técnicos a Fundación Juana de Veiga.

Con este obxectivo, manterá en próximas datas reunións con axentes do sector lácteo para acordar estas medidas. Precisamente, para implementar estes traballos, o Consello autorizou este xoves a firma, por parte de Medio Rural, dunha addenda de modificación á prórroga do acordo coa Fundación Juana de Veiga para desenvolver esta estratexia.

O acordo inicial asinouse con data do 1 de agosto de 2019 para a coordinación, organización e funcionamento dos grupos de traballo sobre o sector lácteo creados pola Consellería con esta finalidade. Agora modifícase e prorroga o convenio, co obxectivo de facer un estudo dos custos de produción das explotacións.

Así, a Xunta considera necesario dispor dun sistema de información rigoroso e representativo destes custos, atendendo aos diferentes estratos de tamaño das granxas. Unha necesidade que, conforme apuntou, refórzase pola entrada en vigor do Real Decreto estatal que establece que o prezo pactado entre o produtor e o seu primeiro comprador debe cumprir os custos de produción.

Outra necesidade detectada, segundo sinala, é a de desenvolver unha normativa reguladora para as novas marcas de calidade, como o leite de pastoreo. Trátase de unificar criterios, evitar crear confusión ao consumidor e a consecuente perda de credibilidade, creando para iso a marca específica 'Leite de Pastoreo de Galicia'.