O maior foco en Ourense é xa o de Vilar de Barrio con nove casos
Sumou dous novos contaxios. O foco detectado en Baños de Molgas, na mesma provincia, mantense con tres positivos.
Por Europa Press / Redacción | Ourense | 01/08/2020 | Actualizada ás 11:05
O foco de coronavirus detectado no municipio ourensán de Vilar de Barrio, e que obrigou a hospitalizar a un matrimonio de nonaxenarios, suma dous novos positivos e alcanza os nove casos activos, mentres que o localizado en Baños de Molgas mantense en tres casos, como en días anteriores.
Así o confirmaron fontes da área sanitaria, que apuntaron que na última xornada detectáronse dous novos casos positivos na área, vinculados ao brote de Vilar de Barrio e ningún cambio con respecto ao de Baños de Molgas.
Ademais, destacaron que das case 150 PCR realizadas na área sanitaria de Ourense durante a última xornada só se detectaron estes dous positivos novos. As autoridades sanitarias continúan avanzando na identificación e seguimento dos contactos estreitos dos novos positivos.
O primeiro caso deste brote detectouse o mércores, cando unha muller de 91 anos tivo que ser ingresada no hospital e resultou positivo en COVID-19. O seu home, de 90, tamén restuou positivo. A raíz da análise de contactos, as PCR permitiron localizar desde esa xornada outros sete casos, aínda que non foi necesario ningún ingreso hospitalario adicional.
Por mor destes datos, o Concello de Vilar de Barrio decidiu tomar medidas de protección como a intensificación das desinfeccións, a suspensión de actividades de lecer grupal ou o peche preventivo e temporal da piscina municipal.
BAÑOS DE MOLGAS
Por outra banda, o brote con tres casos detectado no municipio ourensán de Baños de Molgas continúa sen cambios unha xornada máis. A primeira paciente identificada neste foco é unha muller de 79 anos que se atopa ingresada no hospital. Dous dos seus contactos deron tamén positivo por COVID-19.
Dentro deste brote, Sanidade identificou inicialmente 21 contactos, parte deles residentes fóra de Galicia, aos que se practicaron probas PCR. Polo momento, non hai novos positivos.
