Dan positivo dous familiares do home que veu de Santo Domingo e se apuntou no rexistro de viaxeiros
As tres persoas están illadas no Carballiño.
Por Europa Press / Redacción | SANTIAGO DE COMPOSTELA | 02/08/2020 | Actualizada ás 13:54
Dúas persoas relacionadas co primeiro caso positivo de COVID-19 detectado cunha PCR preventiva realizada a unha persoa inscrita no rexistro de viaxeiros de Galicia deron tamén positivo, informaron este domingo fontes sanitarias.
Deste xeito, Galicia rexistra un novo brote familiar. As tres persoas afectadas están illadas no municipio do Carballiño (Ourense) e permanecen en seguimento sanitario.
A área sanitaria de Ourense rexistrou este sábado o primeiro caso de coronavirus derivado dunha PCR realizada de forma preventiva a unha persoa inscrita no novo rexistro de viaxeiros posto en marcha pola Xunta. Trátase dun viaxeiro procedente de Santo Domingo e o rastrexo dos seus contactos estreitos arroxou este domingo dous positivos máis, que son dous familiares directos, explicaron as mesmas fontes.
O resto dos contactos aos que se lles realizou a proba tiveron resultado negativo, pero deberán gardar unha corentena de 14 días monitorados polas autoridades sanitarias.
O Goberno galego implantou un rexistro obrigatorio para os viaxeiros procedentes de territorios cunha incidencia da COVID 3,5 veces superior á galega, no que quen chegue a Galicia deben inscribirse e deixar os seus datos de contacto.
