Falece unha persoa afogada en Ferrol arrastrada pola corrente
Os socorristas conseguiron rescatalo pero non puideron xa reanimalo.
Por Europa Press / Redacción | Ferrol | 02/08/2020 | Actualizada ás 20:50
Unha persoa faleceu afogada este domingo na praia de Ponzos, en Covas, en Ferrol, tras ser arrastrada pola corrente, informou o 112.
O primeiro aviso recibiuse ás 17,15 horas, cando un particular chamou para indicar que había unha persoa en apertos na auga. No entanto, outra persoa púxose en contacto co 112 para sinalar que eran dúas persoas as que tiñan problemas porque as estaba arrastrando a corrente.
Unha destas persoas logrou saír da auga polos seus propios medios, pero o outro bañista tivo que ser rescatado e morreu, a pesar dos esforzos dos socorristas do areal por reanimalo. Unha vez alí, os profesionais sanitarios só puideron confirmar o falecemento.
O 112 deu aviso a Salvamento Marítimo e o Servizo de Gardacostas de Galicia, ademais da o 061, a Policía Nacional e a Local.
