Navantia saca ao mar o primeiro dos buques construídos para a Armada australiana
O barco percorrerá durante tres días as augas de Ferrolterra para detectar se existen incidencias antes da súa entrega definitiva.
Por E.P. | SANTIAGO DE COMPOSTELA | 04/08/2020 | Actualizada ás 13:49
O primeiro buque loxístico que Navantia constrúe nos estaleiros da Ría de Ferrol para a Armada de Australia iniciou na mañá deste martes, 4 de agosto, as súas probas de mar, que, segundo as previsións, desenvolveranse durante tres días en augas próximas ás costas de Ferrolterra.
O buque do tipo AOR partiu sobre as 9,00 horas e contou coa colaboración de dous remolcadores, "Ibaizabal cinco" e "Ramón Casas", ata a súa saída de augas da ría de Ferrol.
No barco viaxan tanto persoal de Navantia como de compañías auxiliares, ademais de representantes da Armada de Australia. Teñen previsto testar as capacidades do buque e do seu equipamento, co obxectivo de detectar calquera tipo de incidencia, para que no caso de que se produza solucionalo antes de que o buque sexa entregado de maneira definitiva.
De cumprirse as previsións, o barco regresará a un dos peiraos de Navantia Ferrol a última hora da tarde deste xoves, 6 de agosto, un dos últimos fitos que debe de superar a nave antes de emprender viaxe ás Antípodas, barallándose como data probable finais deste mes de agosto ou principios de setembro, segundo fontes consultadas por Europa Press.
