O incendio de Lobios arrasa xa 400 hectáreas

O Parque Natural Baixa Limia - Serra do Xurés está sendo castigado polos lumes.

Por Europa Press / Redacción | Santiago de Compostela | 09/08/2020 | Actualizada ás 11:05

Comparte esta noticia

O incendio de Lobios (Ourense), no que onte morreu un dos tripulantes dun hidroavión e o outro quedou ferido, segue activo e queimou xa 400 hectáreas, de acordo cos últimos datos da Consellería do Medio Rural.

A Unidade Militar de Emerxencias traballa na extinción do incendio en Lobios
A Unidade Militar de Emerxencias traballa na extinción do incendio en Lobios | Fonte: UME.

Neste lume, que entrou desde Portugal e está a queimar terreos do Parque Natural Baixa Limia - Serra do Xurés, afecta desde as 8,00 horas do sábado á parroquia de Manín. Na zona traballaron ata o momento un técnico, 10 axentes, 27 brigadas, 12 motobombas, dúas pas, nove avións e nove helicópteros, ademais da Unidade Militar de Emerxencias (UME).

Segue activo pero estabilizado desde as 00,43 horas do sábado outro lume que afecta a terreos do parque natural: o da parroquia de Requiás, en Muíños, que queimou 50 hectáreas, segundo a estimación provisional. Participaron polo momento seis axentes, 22 brigadas, 14 motobombas, unha pa, nove avións e sete helicópteros.

Tamén na provincia de Ourense, Medio Rural dá por controlado desde as 19,43 horas deste domingo o lume que arrasou 250 hectáreas en Toén, na parroquia de Moreiras. As chamas empezaron o venres pola tarde e, para tratar de apagalas, colaboraron xa tres técnicos, 14 axentes, 37 brigadas, 27 motobombas, tres pas, 12 avións e nove helicópteros, ademais da UME.

Por último, o incendio que comezou o sábado ás 20,15 horas en Chandrexa de Queixa, tamén en Ourense, está controlado desde as 19,53 horas deste domingo, tras queimar unha superficie que se estima en 25 hectáreas. Para apagar as chamas, que afectan á parroquia de Requeixo, participaron polo momento catro axentes, 11 brigadas, dúas motobombas, dous avións e tres helicópteros.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta