Homologan xudicialmente o acordo para refinanciar Nova Pescanova para a súa capitalización ou quita de débeda

O xulgado do Mercantil número 1 de Pontevedra homologou o acordo de refinanciamento aprobado a finais de xuño pasado por Nova Pescanova e que contempla a capitalización ou quita da débeda para permitir a viabilidade da sociedade, segundo informaron fontes xudiciais.

As mesmas fontes precisaron que, segundo indica o auto do xulgado, a empresa non poderá solicitar outra homologación dun acordo de refinanciamento ata que transcorrese polo menos un ano desde a data en que se solicitou a actual homologación (2 de xullo).

En virtude dese acordo (asinado entre Nova Pescanova e acredores como Abanca, Sodigal ou a 'vella' Pescanova, entre outros), os acredores financeiros poderán capitalizar o 100 % da débeda da súa titularidade que resulte afectada, en termos de custo amortizado calculado a data 30 de xuño de 2020 (aínda que se poderá capitalizar tamén o pasivo financeiro adquirido ata tres días hábiles despois da comunicación da firmeza do auto de homologación).

Esta capitalización implica un aumento de capital social, por compensación de créditos, mediante a emisión de novas participacións sociais, cun valor nominal unitario de 0,47 euros, sen prima de emisión.

Isto leva unha quita implícita por un importe igual á diferenza entre o importe nominal e legalmente esixible a vencemento do pasivo financeiro obxecto de capitalización e o custo amortizado do mesmo na data de efectividade.

Os acredores que subscriban esta opción perderán os seus dereitos fronte aos obrigados solidariamente con Nova Pescanova, e fronte ás súas fiadores ou avalistas polo importe da débeda afectada capitalizada.

Por outra banda, se se acollen voluntariamente a esta posibilidade tamén poderán optar pola do 100% da débeda da súa titularidade que resulte afectada.

OUTRAS OPCIÓNS

No caso de que non se elixa ningunha das anteriores posibilidades, os acredores financeiros capitalizarán o 90% da débeda da súa titularidade que resulte afectada, aplicándose tamén o aumento de capital social, por compensación de créditos e a quita implícita por un importe igual á diferenza entre o importe nominal e legalmente esixible a vencemento do pasivo financeiro obxecto de capitalización e o custo amortizado do mesmo na data de efectividade.

Do mesmo xeito, ao optar por esta alternativa, os acredores perderán os seus dereitos fronte aos obrigados solidariamente con Nova Pescanova, S.L., e fronte aos seus fiadores ou avalistas polo importe da débeda afectada capitalizada. Igualmente, tamén poderán optar, alternativamente, pola quita do 90% da débeda da súa titularidade que resulte afectada.

O restante 10% do pasivo financeiro de cada acredor, non capitalizado nin condonado, será obxecto de novación, consistente nunha espera adicional de 3 anos, e unha minoración do tipo de interese aplicable, de modo que este será do 2% no caso do denominados Tramo Senior Ordinario e Tramo Senior Subordinado, e do 0,67% no caso do denominados Tramo Junior Ordinario, Tramo Junior Subordinado e Tramo Adicional Subordinado.

Estes efectos estenderanse aos acredores financeiros que non se sumen ao acordo de refinanciamento, que poderán optar entre a capitalización do 90% dos seus créditos ou entre a quita do 90% do seu importe no prazo dun mes a contar desde a comunicación do auto de homologación a Nova Pescanova.

No acordo recóllese que as sociedades filiais de Nova Pescanova aceptan a quita do 100% da débeda da súa titularidade que resulte afectada.

POSIBILIDADES DA 'VELLA PESCANOVA'

No caso da 'vella' Pescanova, que é acredora pero tamén socia, ofréceselle a posibilidade de proceder á capitalización dos seus créditos (capitalización do 100%), sempre na medida necesaria para manter a súa actual porcentaxe de participación no capital de Nova Pescanova, S.L., equivalente ao 1,65% do mesmo.

De non adherirse, Pescanova, S.A., pola natureza dos seus créditos contra Nova Pescanova, non será considerada como acredor afectado o acordo.