A Xunta insiste en pedirlle ao Estado que coordine ás autonomías contra a Covid-19

O vicepresidente da Xunta en funcións, Alfonso Rueda, instou ao Goberno central a exercer a coordinación para facer fronte á COVID-19 e adopte as modificacións normativas para dotar ás comunidades de capacidade de resposta eficaz e non dicir que "isto é unha guerra pola conta" de cada unha.

Neste sentido, reiterou a petición da Xunta para modificar a Lei de Medidas Especiais en materia de Saúde Pública de modo que se ofrezan ferramentas aos Gobernos autonómicos para tomar medidas ante os brotes ou a extensión do virus, posto que non ten "ningún sentido" que cada vez que se necesite decretar unha medida de confinamento, un cordón sanitario ou limitar o dereito a reunión teña que ser sometido "á ratificación dun xulgado".

Rueda realizou estas declaracións a preguntas dos medios nun acto na Lama, preguntado polas accións concretas solicitadas ao Estado por parte da Xunta. "O que non pode o Estado é desentenderse", sinalou, posto que se trata dunha proposta que vén realizando "practicamente desde o principio": unha modificación normativa que ofreza a competencia ás comunidades para "tomar determinacións sen necesidade de volver declarar o estado de alarma".

Curiosamente, durante o confinamento o presidente galego foi un dos máis incisivos en pedirlle a Pedro Sánchez rematar co estado de alarma para poder xestionar as competencias da descalada en Galicia.