Preocupación entre as familias ante un curso "incerto e inseguro" en plena escalada de novos gromos
As Anpas acusan á Consellería dunha "falta de coherencia" que "pon en perigo" ó alumnado.
- A Covid nas escolas: “A distancia dun metro da Xunta é unha trampa: na práctica serán 50 ou 60cm”
- As anpas rexeitan que os pais poidan decidir se mandan ós seus fillos ás aulas no curso vindeiro
Por Galicia Confidencial | SANTIAGO DE COMPOSTELA | 19/08/2020 | Actualizada ás 11:55
A cada vez menos días de que dea comezo o curso máis atípico que se recorda, a situación entre as familias de alumnos é de "fonda preocupación" ante un ano lectivo "desorganizado". Así o dá a entender a Confederación de Anpas Galegas nun comunicado no que acusan á Consellería de Educación de "falta coherencia e liderado" á hora de xestionar un curso "que se albisca incerto, inestábel, inseguro, mal organizado e enormemente perigoso para as nosas fillos e fillos, así como toda a sociedade galega".
O problema apuntado polas Anpas a raíz da cuestión sanitaria, din, vese agravada por unha xestión autonómica que -segundo apuntan- déixalles a impresión de que "as nosas a fillas e fillos son 'persoal de segunda' con quen non hai que cumprir máis normativa que aquela que garanta non ter que gastar máis diñeiro na súa seguridade e educación". Neste aspecto, Anpas e sindicatos criticaron amplamente o feito de que o protocolo establecido pola Consellería de Educación contemplase como distancia mínima nas aulas de apenas 1 metro, cando o limiar de distanciamento empregado no resto de contextos sociais é de polo menos 150 centímetros.
Ante esta situación, a Confederación de Anpas vén de elaborar un manifesto de mínimos para formular as súas peticións de cara ó vindeiro ano escolar. Entre as medidas recollidas na listaxe, destaca o feito de ampliar a distancia de seguridade nomeada ata os 1'5, un movemento que, recoñecen, precisaría financiamento. "Por iso esiximos directamente máis aulas dispoñibles e profesorado para esas aulas", destacan.
MODELO DOMICILIARIO, NON ONLINE
Aínda que para as Anpas no regreso ás aulas debería primar o modelo presencial -"o completo desenvolvemento social, afectivo, emocional e intelectual do alumnado só é posíbel na interrelación directa e presencial", destacan- recoñecen a posibilidade de que a situación epidemiolóxica impida acadar facilmente este obxectivo. Fronte a esta problemática, nais e pais optan por rexeitar o sistema de educación en liña e optar por un "servizo domiciliario" que "debera ser a canle a ordinaria de atención ao alumnado que por razón de enfermidade non poida asistir ás clases ordinarias. Por outro lado, e logo de negarse a que a asistencia ás aulas fora voluntaria, as Anpas sinalan que non pechan a porta a que as familias "en situación directa de risco sanitario" teñan "a posibilidade de optar pola non asistencia ordinaria ás aulas en tanto permaneza ese risco".
