O BNG volve propor un "gran pacto" pola reconstrución e avisa de que "as vellas políticas" non van servir
Por E.P. | SANTIAGO DE COMPOSTELA | 20/08/2020 | Actualizada ás 14:34
A portavoz nacional do BNG, Ana Pontón, volveu a propor un "gran acordo" pola reconstrución económica e social de Galicia no que, ademais das forzas parlamentarias, participen as universidades, os sectores económicos e os sindicatos.
"Estamos nunha situación extraordinaria que require de medidas extraordinarias e estou convencida de que as vellas políticas e a propaganda non van servir para enfrontar unha situación como esta", manifestou ao ser preguntada pola posibilidade de acordos entre as forzas parlamentarias na lexislatura que arrinca.
Con todo, a líder dos nacionalistas galegos lamentou que desde que se convocaron as eleccións non volvesen ter "ningunha noticia" do presidente da Xunta en funcións, Alberto Núñez Feijóo, para que lles informase sobre a evolución da pandemia nin para coñecer as propostas sobre as medidas a tomar.
"Nós cremos que Galicia e os galegos teñen que estar por diante de calquera outra cuestión, máxime nun momento como este", sostivo Pontón, que asegurou que as medidas que se teñen que tomar "non son as que está recetando a dereita" nin as que se tomaron "durante a crise do 2008".
Así, deixou claro que esta crise "non pode saldarse con novos recortes para os traballadores nin máis discriminación para Galicia". "Quen queira pór por diante os intereses de Galicia terá sempre por diante a man tendida do BNG", indicou.
