Por E.P. | SANTIAGO DE COMPOSTELA | 25/08/2020 | Actualizada ás 17:13
A Consellería de Medio Ambiente asumirá o 70% dos custos que implica a identificación dos animais de compañía daquelas persoas que se visen afectadas pola crise sanitaria da COVID-19.
Así, aqueles cidadáns que sexan responsables dun can sen microchip e que se atopen en situación de vulnerabilidade económica, en paro, nun ERTE ou con redución de xornada debido á necesidade de atender os coidados de menores ou maiores dependentes poderán dirixirse a un dos 767 veterinarios de Galicia que poden implantar este sistema de identificación.
É un dos compromisos que recolle o convenio de colaboración que asinaron este martes a conselleira Ángeles Vázquez e o vicepresidente do Consello Galego de Colexios Veterinarios, Ricardo Vecillas.
Ao amparo deste acordo, dotado con 35.000 euros, distribuiranse de forma gratuíta os elementos necesarios para a identificación e rexistro dos animais no Rexistro galego de animais de compañía entre os veterinarios autorizados (767 en Galicia) que voluntariamente desexen participar na iniciativa.
O convenio tamén prevé a elaboración dun protocolo de hixiene e limpeza dos animais de compañía ante a COVID-19, para a súa implantación nos 31 centros de recollida de animais abandonados autorizados (que na actualidade acollen a case 5.000 animais).
O documento inclúe consellos e recomendacións para axudar aos profesionais pertencentes a este colectivo e aclara dúbidas aos propietarios das mascotas.
Ambas as entidades consideran "esencial", segundo a Xunta, o establecemento de mecanismos para reactivar os procesos de adopción e identificación de animais domésticos, que ven afectados como consecuencia da crise sanitaria.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.