Así afecta a "saturación" da sanidade pública ás residencias: "non nos queda persoal sanitario"

A "saturación" da sanidade pública denunciada polo sindicato médico CESM comeza a amosar síntomas máis alá da propia Atención Primaria. E é que "situación límite" de hospitais e centros de saúde comeza a penetrar tamén en residencias e centros de atención a maiores. Así o denuncia a CIG de Ourense con respecto ó Centro de Atención a Persoas Maiores de Taboadela, que -segundo destacan- non conta xa con persoal sanitario logo de que este fora reclamado pola sanidade pública.

"A necesidade de enfermeiras e enfermeiros na sanidade pública deixa as residencias sen persoal sanitario", resumen dende a formación. De acordo co sostido pola Confederación, o CAPM de Taboadela tería quedado sen un só sanitario para atender ós anciáns en plena pandemia. Dende o sindicato califican de "lamentable" unha circunstancia da que responsabilizan de xeito directo á Consellería de Política Social.

Neste aspecto, a CIG afea á Xunta que "non dote o centro de persoal sanitario" en plena pandemia de covid-19, de xeito que a labor dos coidados e a súa conseguinte responsabilidade queden en mans dunhas auxiliares "xa sobrecargadas de traballo". Ante esta circunstancia, a Confederación insta ó goberno galego a que "dote este centro de persoal de enfermería" para poder facer fronte de xeito efectivo á pandemia de covid-19.

OS RASTREXADORES DA XUNTA

A denuncia da CIG chega pouco despois de que o sindicato médico CESM alertase de que a Atención Primaria se atopa nunha situación "límite" e que "xa non pode máis". Fontes do sindicato apuntaron a unha "sobrecarga de traballo" que estaría vencellada á "crecente demanda asistencial" motivada pola pandemia pero tamén á "ausencia total de planificación" por parte da Xunta.

En liñas paralelas, o CESM afea á Xunta que descargara sobre a Atención Primaria os "labores de diagnóstico e seguimento de pacientes con coronavirus", unha responsabilidade que se suma á "sobrecarga" denunciada e que, apunta, veu motivada polo "fracaso do sistema de seguimento de contactos infectados impulsado polo Sergas ao non contar co persoal necesario para realizar estas tarefas".