As Anpas piden a Feijóo que "rectifique" o protocolo mentres estea a tempo para "evitar o contaxio" das familias

Aseguran que as normas de Educación foron desenvoltas "para unhas expectativas sanitarias que hoxe están feitas anaquiños."

Por Galicia Confidencial | SANTIAGO DE COMPOSTELA | 27/08/2020 | Actualizada ás 12:44

Comparte esta noticia

Conforme avanzan os días e se vai achegando a data de inicio do curso escolar máis incerto da historia vanse tamén acumulando as presións á Xunta de Galicia para que retire o actual protocolo e opte por outras medidas de prevención. A última voz en sumarse a este clamar é o das nais e pais que integran a Confederación de Anpas Galegas, que veñen de dirixir unha carta aberta ó presidente da Xunta para transmitirlle o seu descontento a respecto da norma.

O presidente de Galicia, Alberto Núñez Feijóo. Pool
O presidente de Galicia, Alberto Núñez Feijóo. Pool

As denuncias da Confederación discorren paralelas ós puntos que levan ocupando as críticas de sindicatos, docentes e asociacións ao longo destes meses, destacando a "distancia mínima" entre rapaces -na práctica de menos dun metro-, tan reducida que "resulta difícil atopar aulas onde non se cumprira xa de antes".  E é que, advirten as Anpas, o retorno ás aulas será desenvolto de xeito "case ordinario", "con algo máis de limpeza se cadra", pero sen cambios substanciais con respecto ó ano pasado. Ante esta circunstancia, pais e nais recoñecen o seu "medo" e "preocupación" a que os seus fillos "vaian ó colexio a contaxiarse" e "traian a desgraza á casa e á vida dos mariores".

Ante esta circunstancia, a Confederación insta ó goberno 'popular' e "rectificar" a súa postura, retirando o protocolo e dispoñendo no seu lugar unha serie de normas que poñan fin á "inexplicábel teimosía" da Xunta "en manter unhas normas que se fixeron hai meses, para unhas expectativas sanitarias que hoxe están feitas anaquiños". E advirten: "comezar o curso hoxe mesmo, xa non digamos coa previsión a quince días vista, coas normas insuficientes e ridículas que están nas mans dos centros, é condenarnos a repetir o que xa vivimos".

 

OS COLEXIOS, FOCO DE CONTAXIOS

 

Tal e como xa destacou o presidente da Confederación en declaracións a Galicia Confidencial, o principal foco de preocupación das nais e pais é que os contaxios que poidan ter lugar nas aulas vaian máis alá destas, afectando á sociedade en xeral. Por iso instan a Feijóo a que actúe contra o "medo" que "se está a transmitir entre a sociedade, que vai impregnar os centros escolares, que afecta ao alumnado, ao profesorado, ás familias, ao persoal non docente, a calquera que entre nun centro escolar".  "Ese medo, presidente, non lle fai pensar que quizais non se están facendo ben as cousas?", conclúen.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta