Confirman casos de Covid entre traballadores de tendas do centro As Cancelas de Santiago
Traballadores do centro confirman a existencia de casos en varias tendas e din que unha do grupo Inditex está sendo desinfectanda. O centro comercial asegura que son "casos illados".
Por Sara Gil | SANTIAGO DE COMPOSTELA | 27/08/2020 | Actualizada ás 13:49
Unha captura de pantalla de Whastapp anda a espallarse de teléfono en teléfono pola comarca santiaguesa e bisbarra, denunciando un gromo no Centro Comercial As Cancelas, na área comercial máis grande da capital galega, con nove positivos nun local do centro comercial e algúns máis espallados noutras tendas do mesmo inmoble.
O CHUS desmintiu esta información, dicindo que non se detectara ningún gromo en ningún dos centros comerciais de Santiago.Tamén o centro comercial suliña que non se produciu un brote infeccioso no centro comercial. "Identificáronse tres casos de positivos illados que corresponden a persoas asintomáticas, sen relación entre si e que se detectaron grazas aos rastrexos externos postos en marcha polas autoridades sanitarias", apuntan nun comunicado.
"As persoas afectadas deixaron de acudir aos seus postos de traballo desde o mesmo momento en que deron positivo nas probas de detección e as empresas ás que pertencen tomaron de inmediato as medidas adecuadas de rastrexo de contactos próximos e desinfección de locais", indica.
VARIOS CASOS
Fontes consultadas por Galicia Confidencial que traballan neste centro comercial, confirman a existencia de casos positivos de traballadores de diferentes locais. "Houbo 5 casos positivos nunha das tendas de roupa de Inditex. Mandaron aos seus dependentes a casa, pecharon a tenda antes da hora prevista e desinfectaron todo case o mesmo día", apuntan.
"Ademais, aqueles que deron negativo están en corentena", indica unha das fontes. Engade que "tamén hai outros 3 casos illados en dúas tendas máis, pero non fixeron limpeza nin desinfección". "Dende a administración do centro comercial non se está tomando ningunha medida", advirte outra as traballadoras. "O centro comercial non o quere facer público, porque desta maneira perderían clientela", conclúe un dos traballadores.
NORMALIDADE
Desde o Centro comercial As Cancelas insisten en que se seguiron todos protocolos e medidas de seguridade esixidas polo Ministerio de Sanidade e as autoridades competentes. "A colaboración entre os empleadores dos afectados, a xerencia das Cancelas e as autoridades sanitarias foi constante e fluída en todo momento", indican.
Por iso, aclaran que todas as tendas das Cancelas permanecen abertas e funcionando con normalidade. "Mantéñense os protocolos de limpeza e desinfección e ventilación permanente, o uso de equipos de protección individual (biombos, máscaras, etc.) e de xeles hidroalcohólicos, así como as medidas de distancia social postas en marcha no centro e que garanten a seguridade para empregados, provedores e clientes", aseguran.
Tamén advirten sobre bulos "A xerencia do centro comercial, co fin de evitar a propagación de rumores que poidan xerar alarma, ponse a disposición para calquera aclaración ou información adicional que contribúa á tranquilidade e á confianza no cumprimento dos protocolos sanitarios e de seguridade no recinto comercial", conclúen.
