Por Europa Press / Redacción | VIGO | 27/08/2020 | Actualizada ás 16:38
Asociacións de hostaleiros de Pontevedra, A Coruña e Lugo anunciaron a presentación dun recurso ante a sala do contencioso administrativo do Tribunal Superior de Xustiza de Galicia (TSXG) contra a orde que obriga ao peche de establecementos de lecer nocturno.
Segundo confirmaron, a decisión de acudir aos tribunais e recorrer esa orde da Consellería de Sanidade (do pasado 14 de agosto) débese a que consideran a medida "desproporcionada", e piden deixala sen efecto.
Estas organizacións lembraron que o sector do lecer nocturno "é unha das actividades empresariais e económicas que está a sufrir as peores consecuencias da crise do coronavirus" e lamentaron que se está "proxectando na poboación unha imaxe negativa" da súa actividade.
Así, denunciaron que se lles está "culpabilizando de boa parte dos rebrotes" de COVID, a pesar de que o sector "levou a cabo escrupulosamente todas as medidas sociais, hixiénicas e de seguridade que indicaron en todo momento as autoridades sanitarias".
Por iso, decidiron acudir aos tribunais para reclamar a reapertura dos seus negocios, porque o peche supón unha situación "insustentable" que producirá "perdas económicas irreparables". Ademais, estudarán a posibilidade de levar a cabo mobilizacións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.