Paro: A Xunta resalta que "Galicia resiste a crise" da covid e os sindicatos ven "máis pobreza"
Galicia perdeu máis emprego que a media do estado en agosto.
Por Europa Press / Redacción | SANTIAGO DE COMPOSTELA | 02/09/2020 | Actualizada ás 14:42
A Xunta destacou que "Galicia resiste a crise xerada pola covid-19 coa creación de emprego por cuarto mes consecutivo", en relación aos 7.126 cotizantes máis que sumou a Seguridade Social en agosto, a pesar de subir o número de parados máis que no conxunto do Estado.
A través dunha nota de prensa, a secretaria xeral de Emprego, Covadonga Toca, valorou que os datos de afiliacións, co cuarto incremento consecutivo (entre maio e agosto) "permiten recuperar o emprego perdido en marzo e abril". Resalta que a comunidade se sitúa, desta forma, como a segunda en que máis crecen os cotizantes en termos absolutos, o que na súa opinión mostra "a capacidade de reacción" de Galicia.
SINDICATOS
Pola súa banda, os sindicatos advertiron da existencia de "máis pobreza e exclusión social" en Galicia por mor dos datos do paro rexistrado. Por iso, e no contexto da pandemia da covid-19, reclamaron "asegurar a reincorporación dos traballadores".
En rolda de prensa, o secretario xeral da CIG, Paulo Carril, lamentou "o drama real" daqueles que sufriron despedimentos "desapiadados" debido á crise sanitaria, e remarcou a "urxencia" de derrogar a reforma laboral e que as empresas teñan a "obrigación" de reincorporar aos traballadores en expedientes de regulación de emprego temporais (ERTE).
Pola súa banda, UGT destacou que "é preciso frear a pandemia e asegurar a reincorporación dos traballadores con seguridade", tamén mediante a "reversión" da reforma laboral e unha política económica "expansiva".
Mentres, CC.OO. avisa de que "a precariedade e a intensa rotación no emprego explican" a actual situación, pois "no último mes fixéronse nove contratos por cada alta na Seguridade Social".
