A CIG alerta dun 2021 "morto" en Navantia coa perda de "case 3.000 postos de traballo" na industria auxiliar
Decenas de traballadores de Navantia Ferrol concentráronse hoxe diante do Parlamento de Galicia para reclamar carga de traballo no vindeiro ano.
Por Europa Press / Redacción | SANTIAGO DE COMPOSTELA | 03/09/2020 | Actualizada ás 19:29
A Confederación Intersindical Galega (CIG) alertou de que 2021 será un "ano morto" no estaleiro de Navantia Ferrol dado que, unha vez parta a final deste 2020 o segundo barco loxístico para a Armada australiana (o primeiro saíu o pasado mércores), non haberá carga de traballo ata febreiro de 2022, data na que está previsto que comecen os traballos de construción das fragatas F-110 para a Armada de España.
Así o expresou o responsable do sindicato nacionalista no estaleiro da cidade naval, Marcelo Amado, en declaracións aos medios ás portas do Parlamento de Galicia, onde na mañá deste xoves (xornada na que finaliza o debate de investidura) concentráronse decenas de traballadores de Navantia Ferrol para reclamar carga de traballo.
"A final de ano ímonos a quedar sen carga de traballo. Non é dicir que haberá pouca, é que non vai haber ningunha", advertiu Amado, que puxo o foco en que non haberá actividade, con excepción da eólica e a eólica mariña, ata que se inicie a construción das fragatas F-110, o que suporá que "3.000 persoas queden sen traballo" ata febreiro de 2022, cando está previsto que arrinquen as tarefas, aínda que a CIG dá por feito que será máis tarde.
"2021 será un ano morto, desértico", sentenciou o responsable da central nacionalista, que apuntou que, aínda que a situación afectará tamén os traballadores da empresa principal, será máis grave para a industria auxiliar. "Van ser o que se vaian á rúa", apostilou.
Así as cousas, demandan que, ante a "imposibilidade" de que exista un encargo que cubra o período entre as fragatas australianas e as españolas, o contrato de execución destas últimas "adiántese" para dotar de carga de traballo ao estaleiro ferrolán, onde, segundo lamentou o responable sindical, os investimentos do plan estratéxico "están a ser moi pequenos" e limitan a capacidade de renovar as súas instalacións e actualizalas a nivel tecnolóxico.
