Incendio no Pindo... Xa van máis de 20 hectáreas queimadas en poucas horas

Un incendio afecta desde a mañá deste domingo á parroquia do Pindo, no municipio de Carnota, segundo informa a Consellería do Medio Rural. As primeiras estimacións estiman a superficie afectada en máis de 20 hectáreas. Este lume súmase aos que afectan este domingo aos municipios ourensáns da Mezquita, Vilariño de Conso e Chandrexa de Queixa.

O incendio que afecta á parroquia de Esculqueira, na Mezquita , segue activo, tras queimar xa unhas 130 hectáreas, de acordo coas últimas estimacións da Consellería do Medio Rural.

A pesar de que os profesionais que traballaban na zona chegaron a telo "practicamente controlado", unha nova fronte procedente tamén do outro lado da fronteira, reactivouno, indicou a Xunta. Para o control deste incendio mobilizáronse ata o momento 11 axentes, 25 brigadas, 12 motobombas, tres pas, 12 avións e nove helicópteros.

VILARIÑO DE CONSO E CHANDREIXA DE QUEIXA

Por outra banda, en Vilariño de Conso quedaron controlados ás 8,36 horas deste domingo os dous lumes que se rexistraron dentro do territorio do municipio. Comezaron o venres pola noite, con tres focos cada un deles.

De acordo coas últimas estimacións as superficies afectadas son de 16,42 hectáreas na parroquia de Castiñeira e 45,39 hectáreas na parroquia de San Cristivo.Ata o momento mobilizáronse 12 axentes, 22 brigadas, nove motobombas e tres pas.

En canto ao lume que afecta a Chandrexa de Queixa, tamén na provincia de Ourense, quedou controlado ás 20,52 horas do sábado, de acordo coas mesmas fontes, que apuntan que as estimacións de superficie afectada sitúana en 40 hectáreas --un arboredo e 39 de monte raso--.

Este incendio comezou o venres ás 16,43 horas na parroquia de Queixa e na extinción traballaron ata o momento sete axentes, 23 brigadas, seis motobombas, tres pas, nove helicópteros e dous avións.