A taxa de mortes no último mes por mor do coronavirus é de 1,4 diarias
As vítimas soben a 663 en Galicia ao falecer unha muller de 80 anos na residencia Orpea Coruña.
Por Europa Press / Redacción | SANTIAGO DE COMPOSTELA | 08/09/2020 | Actualizada ás 12:50
Un falecemento producido nas últimas horas na residencia de maiores Orpea Coruña, en Culleredo, eleva as vítimas da pandemia da COVID-19 a 663. Un número de falecidos que dá unha taxa de 1,4 mortes diarias desde o pasado 7 de agosto, que foi cando se deu a primeira morte despois de varios meses sen falecementos.
Segundo informan a Europa Press fontes sanitarias, a nova falecida é unha muller de 80 anos. A Consellería de Sanidade informou desta nova morte no parte de datos do coronavirus remitido este martes, actualizado con cifras de última hora do luns. A vítima contaba con patoloxías previas.
As mortes con COVID-19 subiron nas últimas semanas, co aumento dos brotes e os contaxios en Galicia. Desde a 'nova normalidade' notificáronse un total de 44 decesos, o primeiro deles, o dunha muller o pasado 7 de agosto en Ourense. Antes diso, a comunidade encadeara case dous meses --desde o 10 de xuño-- sen falecementos.
