Os sindicatos acusan a Educación de boicotear a folga de profesores para os días 10 e 16 de setembro
As organizacións de profesorado mostráronse abertas ao diálogo co conselleiro para a resolución do conflito e para tentar garantir a seguridade neste curso escolar, a falta de dous días do seu inicio.
Por Europa Press / Redacción | SANTIAGO DE COMPOSTELA | 08/09/2020 | Actualizada ás 17:50
Continúa a rifa entre os sindicatos de profesorado e a Consellería de Cultura, Educación e Universidade. Un día despois de que Román Rodríguez tomase formalmente as rendas do departamento, as organizacións convocantes da folga do 10 e do 16 de setembro denunciaron as condicións abusivas impostas pola Xunta, que endureceu os servizos mínimos decretados para a protesta xustificándose na situación de emerxencia sanitaria e a necesidade de garantir as medidas preventivas previstas ante a COVID-19.
O Diario Oficial de Galicia publica este martes a orde que regula as condicións e os servizos mínimos para as xornadas de protesta, na que apuntan a que as "circunstancias extraordinarias e graves" na que se atopa o territorio "obrigan" a afastarse dos criterios habituais fixados en anteriores convocatorias de folga.
Segundo o texto, terá que acudir a cada centro o titular da dirección, un profesor por cada grupo de alumnos, ademais do 100 por cen de persoal de limpeza, de cociña, auxiliar coidador, ou educadores e ATS e persoal médico, entre outros.
Entre os motivos apelan ao artigo 43.1 da Constitución e ao dereito á protección á saúde, e a que os servizos fixados deben ser os adecuados para lograr o "cumprimento efectivo das medidas preventivas" fixadas polas autoridades para evitar a propagación da pandemia, entre elas a limitación de contactos ou de hixiene que requirirán o estímulo e vixilancia do persoal do centro.
Educación incide, expresamente, en que a folga está prevista para o primeiro día de entrada no centro nas aulas tras as vacacións de verán, é dicir, un día "clave" para garantir o cumprimento destas medidas.
CONDICIÓNS ABUSIVAS
Estas condicións non gustaron entre o catro organizacións convocantes da folga, que xa avanzaron que impugnarán os servizos mínimos por consideralos "abusivos" e un intento de boicotear a convocatoria dos sindicatos para o inicio do curso.
CC.OO Ensino avanzou a presentación dunha denuncia ante unhas medidas que implican, na práctica, "impedir" o dereito a folga e STEG criticou que a orde "vulnera" o dereito a participar aos traballadores.
CIG-Ensino acusou a Román Rodríguez de utilizar a súa primeira medida como conselleiro do ramo para impor uns servizos "abusivos" e tentar boicotear a convocatoria das organizacións. Unha decisión que, ao seu xuízo, choca "frontalmente" coas intencións manifestadas nunha misiva remitida este luns, na que convocou a estas organizacións (xunto a ANPAs e outros representantes) a un Consello Escolar de Galicia e a outra reunión para tentar buscar unha saída a esta situación.
É por iso que Bermello insta ao titular de Educación a demostrar a súa "boa vontade" modificando a proposta de servizos mínimos que se presentou ao comité de folga. En todo caso, as organizacións de profesorado mostráronse abertas ao diálogo co conselleiro para a resolución do conflito e para tentar garantir a seguridade neste curso escolar, a falta de dous días do seu inicio.
