Urxen un plan de medidas para o transporte colectivo urbano de viaxeiros en Galicia contra a crise da covid-19
Advirten de que o transporte urbano "foi, desde o principio, un dos sectores que máis sufriu pola pandemia".
Por E.P. | Santiago de Compostela | 08/09/2020 | Actualizada ás 20:10
A asociación empresarial de transportes colectivos urbanos de Viaxeiros de Galicia solicita ás administracións "un plan urxente de medidas económicas e estratéxicas" para facer fronte á crise da covid-19.
Esta asociación advirte de que o transporte urbano "foi, desde o principio, un dos sectores que máis sufriu pola pandemia da covid-19".
E cita cifras do INE para afirmar que, en Galicia, segundo o INE, "ata o mes de xuño, as perdas acumuladas de viaxeiros durante 2020 supoñen un 44,2% con respecto ao ano pasado, chegando a cifras marca de baixa utilización durante o mes de abril, con só un 10,5% de usuarios".
As empresas operadoras de Galicia afrontaron esta crise, segundo defenden, "con responsabilidade desde o primeiro momento, garantindo a mobilidade daquelas persoas que tiveron que desprazarse durante o estado de alarma, así como priorizando, ante todo, tanto a saúde e a seguridade do seu persoal como de de o público usuario".
En concreto, reivindican "multiplicar" os esforzos para garantir unha contorna segura a bordo, intensificando os labores de limpeza e desinfección, instalando biombos de protección, dispondo de xel hidroalcohólico e establecendo rigorosos protocolos de actuación en protección de todos os axentes afectados, o cal tamén está a supor un importante gasto na explotación do servizo".
No entanto, a pesar de todos estes esforzos, o transporte urbano mantén a día de hoxe "unha importante redución de utilización por parte dos usuarios, concretamente ao redor dun 40% menos con respecto a anos anteriores", segundo os seus datos.
Esta falta de ingresos xéralles, segundo avisan, "importantes problemas económicos aos operadores, pondo en risco a viabilidade do servizo e das empresas".
"Nestes momentos de enorme incerteza, é esencial lembrar que o transporte urbano colectivo é unha peza esencial e estratéxica sobre retos de vital importancia para as nosas cidades e para o planeta, tales como a sustentabilidade e a loita contra o cambio climático", subliñan.
Por todo iso, a Asociación empresarial de transportes colectivos urbanos de Galicia pide a concellos e ás demais administracións un plan urxente de medidas económicas e estratéxicas e "que aposten máis que nunca por políticas que reforcen aínda máis o transporte público como medio de transporte prioritario dentro das cidades".
