Sorprenden a un home de 76 anos cultivando plantas de marihuana

A Garda Civil de Ourense detivo a un veciño de Oímbra, de 76 anos, ao que sorprendeu realizando labores de recolección de plantas de marihuana.

Segundo informaron os axentes, a detención produciuse sobre as 14,30 horas deste martes, cando os gardas civís sorprenderon a C.P.P., de 76 anos, colleitando 12 plantas de marihuana, cun peso total de 14 quilos.

En concreto, a plantación atopábase oculta entre a vexetación dunha paraxe coñecida como Os Vidros, en Oímbra. Ao home impútaselle un delito contra a saúde pública por cultivo e elaboración de drogas.

Intervidas 12 plantas de marihuana nunha leira | Fonte: GARDA CIVIL