O Movemento Galego da Saúde Mental pide maior implicación das institucións contra o suicidio
O Movemento considera que o Plan Galego de Prevención do Suicidio aprobado en 2017 é "un documento de boas intencións pero inoperante".
Por E.P. | SANTIAGO DE COMPOSTELA | 09/09/2020 | Actualizada ás 20:14
Movemento Galego da Saúde Mental demandou a implicación "sen escatimar recursos" das institucións para facer fronte a unha problemática que afecta "a toda a sociedade" como é o suicidio.
Este mércores, en véspera do Día mundial para a prevención do suicidio que ten lugar cada 10 de setembro, o colectivo lembra que a asemblea da Organización Mundial da Saúde (OMS) instou á comunidade internacional a comprometerse con "estratexias nacionais multisectoriais" para reducir a taxa de suicidios nun 10% para este ano 2020.
Todo iso co obxectivo de consolidar unha tendencia decreciente no número de suicidios, unha problemática que a Xunta "tardou anos en recoñecer" como "unha urxencia" á hora de elaborar un plan de prevención do suicidio acompañado dunha estratexia de saúde mental.
Así, Movemento Galego da Saúde Mental considera que o Plan Galego de Prevención do Suicidio aprobado en 2017 é "un documento de boas intencións pero inoperante" ao carecer de cronograma, orzamento asigando, responsables técnicos e unha avaliación regular que sirva para planificar.
Deste xeito, a entidade lamenta que a Xunta se limite a "anunciar" e "prometer" mentres o número de mortes por suicidio creceu ata as 318 no ano 2019, 30 máis que o ano pasado.
Así as cousas, apela a "non resignarse" ante esta "dura realidade" e insta á sociedade a esixir ao Goberno galego a posta marcha de medidas que sirvan para reducir o número de mortes por suicidio.
