Novas dimisións e protestas en centros galegos polas condicións do inicio do curso académico
Un informe da Deputación da Coruña conclúe que as tarefas de desinfección nos centros é competencia da Xunta e non dos municipios.
- A Xunta cede á presión de pais e docentes e atrasa o inicio do curso en Secundaria, Bacharelato e FP
Por Europa Press / Redacción | Santiago de Compostela | 12/09/2020 | Actualizada ás 11:56
As condicións e medidas expostas para o inicio do curso en secundaria, bacharelato e formación profesional están a xerar toda serie de reaccións entre a comunidade educativa, con concentracións, denuncias en redes sociais e mesmo a dimisión da dirección do centro tanto pola falta de medios como polo "menosprezo" que están a sufrir polos cambios de criterio da Consellería de Cultura, Educación e Universidade.
O departamento dirixido por Román Rodríguez viuse obrigado a atrasar unha semana o arranque da actividade nestas etapas, ata o 23, 24 e 25 de setembro, debido á imposibilidade dos centros para afrontar a adaptación dos espazos educativos ás medidas de prevención fronte ao coronavirus fixadas polas autoridades sanitarias e a administración galega.
Unha decisión que se tomou despois de que institutos galegos da Coruña, Santiago e Pontevedra, entre outros, reclamasen por escrito ás xefaturas territoriais o atraso da volta ás aulas.
Todo iso prodúcese polo que entenden como un novo cambio nas regras de xogo, posto que os servizos de inspección remitiron comunicacións aos centros para que paralizasen a adaptación que estaban a realizar, co fin cambiala polo criterio de uso de biombos cun metro de separación, ademais da teledocencia inicialmente a partir de bacharelato, pero sen descartar 3º e 4º da ESO.
A Xunta mantén que a norma xeral é o metro e medio de separación e que estas solucións serían de carácter excepcional, aínda que o propio Román Rodríguez recoñecía onte que serían os inspectores e as autoridades sanitarias, en función das diferentes casuísticas, os que decidan cantos desdobres serán necesarios.
De feito, instou a aproveitar esta semana de atraso para "profundar" en medidas presentadas nos últimos días no Consello Escolar de Galicia, como a semipresencialidade e a colocación de biombos nas aulas para poder sortear o metro e medio de separación.
DIMISIÓN NA CORUÑA
Tras coñecer a noticia, o equipo directivo do IES Plurilingüe Adormideras da Coruña, un dos centros que asinara a petición de atraso do curso, presentou a súa dimisión. En concreto, denuncia o "menosprezo" cara á comunidade educativa e os "continuos cambios no protocolo contra a COVID-19".
"E todo co vello obxectivo de sempre: non contratar máis profesorado e non gastar un euro no ensino público", engaden. Os traballadores do centro difundiron imaxes a través de redes sociais para visibilizar as consecuencias da separación dun metro entre cabezas, e concentráronse ás portas do centro.
Estas concentracións trasladáronse á súa vez a diferentes puntos do territorio galego, onde se están reclamando a dotación de recursos para poder realizar os desdobres necesarios. Un deles o IES Antón Alonso Ríos, en Tomiño, onde a ANPA reclamou á Consellería a contratación de sete profesores que necesita o centro para poder adaptar a actividade.
DECISIÓN DA INSPECCIÓN
Isabel Ruso, da Asociación de Directores de Institutos de Galicia, Isabel Ruso, recoñeceu que o panorama "cambiou en diferentes ocasións", o que anulou o traballo realizado ata agora nos centros galegos.
Os institutos terán que "reconsiderar" o novo curso coa opción dos biombos e a semipresencialidade, no caso de que así sexa demandado, e que agora a inspección educativa ten "o peso" da decisión final. A pesar diso, recoñeceu as dificultades para conseguir estes materiais, posto que "é o máis duro" de atopar a día de hoxe, "o que trastorna o traballo de moitos días".
En todo caso, as protestas prolongaranse ao longo do mes e os sindicatos docentes manteñen a convocatoria de folga e de concentracións, agora trasladada á nova data de inicio do curso en secundaria.
INFORME PROVINCIAL
Outra das caras do malestar neste inicio do curso afecta á administración local, posto que varios gobernos locais protestaron por ter que asumir os gastos extra motivados polas tarefas de limpeza e desinfección de centros para aplicar o protocolo da COVID-19.
Tras o recente informe da Deputación de Pontevedra, este sábado deuse a coñecer outro da súa homóloga da Coruña que conclúe que a competencia para estas accións é da Xunta de Galicia, ante o "gasto importante" que están a asumir as administracións locais.
