Santiago insiste en aumentar a partida que recibe por ser capital autonómica que este ano será de 2,3 millóns
A cifra está "estabilizada desde hai moitos anos", din desde o consistorio compostelán que insiste en que a cuestión da capitalidade "sempre está presente nas reclamacións do concello".
Por E.P. | SANTIAGO DE COMPOSTELA | 14/09/2020 | Actualizada ás 14:27
Santiago de Compostela recibirá un montante de 2.392.425 euros da Xunta por mor da súa condición como cidade capital da comunidade galega, en virtude do convenio que mantén co Goberno autonómico para sufragar os gastos derivados desta denominación.
A xunta de goberno local abordou este convenio que se abonará á cidade de modo fraccionado en tres partes. En rolda de prensa, o edil Sindo Guinarte lembrou que o executivo local manifestou "en moitas ocasións" a necesidade de que Santiago merece "unha cantidade superior polos custos que a capitalidade significa".
A cifra está "estabilizada desde hai moitos anos", engadiu, e existe esta "reclamación vella" de que se poida modificar á alza nun proceso "de diálogo e negociación para o futuro".
Guinarte recoñeceu que na actualidade "hai outras cuestións con máis présa", sobre todo ante as circunstancias provocadas pola COVID-19, pero insistiu en que a cuestión da capitalidade "sempre está presente nas reclamacións do concello" e está "encima da mesa" nesa relación "de diálogo permanente" que manteñen coa Xunta.
Na mesma sesión da xunta de goberno, abordouse a sentenza favorable na que se desestima o recurso de apelación interposto por ADIF por un requirimento realizado para que o Concello asumise o pago de 6,8 millóns de euros polo convenio subscrito para o desenvolvemento dos sectores de Cornes e Pontepedriña.
Tamén se aprobou a concesión de subvencións ás distintas asociacións de veciños para o desenvolvemento de programas e actividades de interese xeral durante o ano, por máis de 68.000 euros, e deuse luz verde a convenios con distintas entidades de acción social por 95.000 euros.
En concreto, 15.000 á Coordinadora Galega de ONGD, 10.000 para a Asociación de Persoas Xordas de Santiago de Compostela, 3.000 para a Fundación Andrea, 5.000 para o Banco de Alimentos e 60.000 para a Federación de Asociacións de Enfermos Mentais de Galicia (FEAFES).
