Os expertos alertan sobre o contacto co arroás 'Manoliño': "podería rematar nunha agresión sexual"

O investigador Bruno Díaz sostén que a atención dos humanos faille un "fraco favor" ó animal porque "o alonxa da súa vida como delfín", unha situación que pode tornar problemática coa chegada da madurez sexual.

Por Galicia Confidencial | SANTIAGO DE COMPOSTELA | 21/09/2020 | Actualizada ás 09:00

Comparte esta noticia

"Entendo que é difícil xestionar a tentación, pero o mellor é non tocalo". Esta frase viría a resumir as recomendacións do investigador Bruno Díaz, fundador e director do instituto BDRI, a respecto dos contactos con cetáceos rexistrados ao longo das últimas semanas nas costas galegas. Díaz ten unha advertencia para os compañeiros de Manoliño, o máis celébre dos arroaces: "estas cousas acábaas pagando o animal".

Delfín nunha foto de arquivo
Delfín nunha foto de arquivo | Fonte: CEMMA

Aínda que o contacto con este tipo de especies está penado por lei, segue a ser unha práctica habitual -que o investigador ve "comprensible"- da que dan proba os múltiples vídeos viralizados nesta fin de verán."Trátase dun comportamento habitual", explica o investigador. "Os arroaces, sobre todo na súa etapa adolescente -á que parece pertencer Manoliño- interactúan con outros delfíns e, nalgúns casos, con humanos".

Con todo, Díaz non dubida en desaconsellar ferventemente o contacto co cetáceo, calificando de "fraco favor" os posibles lazos afectivos desenvoltos entre este e os seus compañeiros da Ría de Muros-Noia. "Estes animais deben estar nadando con outros delfíns, non con humanos. Con estas prácticas estámolo alonxando da súa vidal social normal", pondera.

O investigador do BDRI discrepa das teorías que suxiren que Manoliño foi expulsando da súa manda e agora busca o cariño das persoas. "Debemos falar máis ben dunha 'expulsión natural', na que o delfín, como parte da súa independencia, se lanza a descubrir o mundo pola súa propia nai", describe a respecto dun proceso que adoita comezar a partir dos dous anos de vida.

A proximidade actual de Manoliño ós mariscadores e navigantes, pois, non tería que ver cunha hipotética expulsión por parte dos seus compañeiros senón coa súa propia iniciativa. "Os arroaces teñen unha sociedade complexa e flexible, pasan o rato con grupos distintos", destaca. Isto implica, para o investigador, que as preferencias do delfín poderían cambiar, volvendo a integrarse cos seus.

POSIBLE AGRESIÓN SEXUAL

A problemática xurdiría no caso de que o contacto coas persoas rematara por alonxar a Manoliño definitivamente da súa especie. Esta situación podería derivar nun conflito cando, "aos 8 ou 9 anos de vida", o arroaz chegue á súa madurez sexual. "Isto podería presentar perigo na súa interacción coas persoas", destaca o investigador, que refire casos documentados en distintas partes do mundo de delfíns en plena erupción hormonal que se propasan con humanos. "Podería rematar agredindo sexualmente á xente", explica, "e estamos a falar dun animal de 3 metros e medio".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta