Por E.P. | SANTIAGO DE COMPOSTELA | 17/09/2020 | Actualizada ás 13:57
Os tres grupos con representación no Parlamento galego, PPdeG, BNG e PSdeG, votaron a favor dunha iniciativa dos populares para que a Xunta se dirixa ao Goberno central "en demanda de carga de traballo para Navantia".
A proposición non de lei, que defendeu na comisión de industria o número dous do PP galego, Miguel Tellado, tamén reclama os "investimentos necesarios" para dispor dun "estaleiro 4.0" que permita a Navantia "seguir competindo e alcanzando novos contratos para o naval galego".
A pesar da unanimidade, o debate supuxo o cruzamento de críticas, sobre todo entre PP e PSOE, posto que, Tellado, como portavoz de industria do grupo maioritario, advertiu de que "a situación quen pode resolvela é o Goberno de España", tras lamentar que hai traballadores aos que lles están chegando "as cartas de despedimento" nestes días.
Pola súa banda, o socialista Martín Seco censurou a Tellado "unha vez máis cargar contra o Goberno de España mentres a palabra industria desaparece da Consellería do señor Conde". Ao seu xuízo, a Xunta realiza unha "política do escapismo" por "unhas competencias que decidiu esconder" nesta materia.
O Bloque, mentres, mostrou o seu apoio á iniciativa ao considerar que "o esforzo do Goberno debería estar á altura" da situación da construción naval. "Nun mundo con tres cuartas partes cubertas polo mar, dicir que a construción naval non ten futuro é como ser doutro planeta", subliñaron os nacionalistas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.