Por E.P. | SANTIAGO DE COMPOSTELA | 18/09/2020 | Actualizada ás 16:57
O presidente do Tribunal Superior de Xustiza de Galicia (TSXG), José María Gómez y Díaz-Castroverde, reclamou reformas de "máis calado", en concreto "novas leis que axilicen a tramitación dos procedementos", para dar resposta aos problemas de asuntos pendentes no ámbito xudicial.
Fíxoo na apertura do Ano Xudicial e nun acto que contou coa presenza, entre outras autoridades, do titular do Executivo galego, Alberto Núñez Feijóo, e do presidente do Parlamento galego, Miguel Santalices.
Díaz-Castroverde sinalou que o número de casos en trámite aumentou un 10% tras a finalización do estado de alarma, en comparación coas mesmas datas de 2019. En concreto, segundo indicou o presidente, a finais de xuño quedaron pendentes de resolución 166.276 asuntos, fronte aos 150.978 rexistrados ao acabar o segundo trimestre do ano pasado.
"Non sabemos con certeza as consecuencias que a paralización dos prazos procesuais e a actual situación socioeconómica suporán a nivel xudicial. Prevese unha avalancha de casos, o que suporá un gran desafío para todos nós", manifestou, entre outros, ante os membros da Sala de Goberno, o fiscal superior de Galicia, Fernando Suanzes, e os vogais do Consello Xeral do Poder Xudicial (CGPJ) José Antonio Ballestero Pascual e Juan Manuel Fernández.
A XUSTIZA "EN XAQUE"
O presidente asegurou que a crise sanitaria puxo "aínda máis en xaque" á Administración de Xustiza e agradeceu "o enorme esforzo" dos xuíces e xuízas de Galicia, quen resolveron durante o segundo trimestre do ano, en pleno estado de alarma, máis de 43.000 asuntos.
Díaz-Castroverde augurou, por outra banda, que os plans de actuación e reforzo que desde o Consello Xeral do Poder Xudicial (CGPJ) e a Sala de Goberno do TSXG están a porse en marcha, aínda que necesarios, serán insuficientes. Por iso, demandou reformas de "máis calado", que permitan unha resposta rápida e con garantías á cidadanía e ás empresas".
Por outra banda, aludiu a outras problemáticas como a ocupación ilegal de vivendas, na que expuxo que as demandas descenderon un 21,5% durante o seis primeiros meses do ano, nos que se presentaron 51 casos deste tipo. Neste sentido, apuntou que a alarma social xerada nos últimos meses sobre a ocupación de vivendas na nosa comunidade "parece non estar avalada polas cifras".
VIOLENCIA DE XÉNERO E INCENDIOS
A loita contra a violencia de xénero foi outra das cuestións que centrou tanto o seu discurso como o do fiscal superior de Galicia, Fernando Suanzes, quen expresou a súa preocupación ante as cifras, máis de 10.000 novos casos incoados durante o pasado ano.
Tamén apelou ao papel da Fiscalía para "velar pola protección de medio ambiente" e lembrou que o ano pasado aumentaron un 38% os procedementos incoados e duplicáronse as cualificacións e sentenzas ditadas.
Os delitos relacionados cos incendios forestais incrementáronse un 18% e supuxeron tres de cada dez infraccións penais contra o medio ambiente. Por iso, apelou a avanzar na coordinación "desde un tratamento integral".
Como o presidente do TSXG, tamén aludiu aos "desafíos" que xerou a pandemia. No entanto, trasladou a súa convicción de que a Administración de Xustiza está "plenamente preparada para dar unha resposta diligente".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.