Por Europa Press / Redacción | Santiago de Compostela | 22/09/2020 | Actualizada ás 15:47
As residencias de maiores galegas rexistran este martes 233 casos activos de coronavirus, tras a detección de oito novos positivos en distintos centros. Así o reflicte o parte diario remitido polas consellerías de Sanidade e Política Social, que suma seis novos contaxios de usuarios da residencia de maiores As Salinas de Ourense, un novo caso activo dun usuario da residencia Ballesol de Oleiros e un maior positivo no centro O Pilar de Bergondo, que ata agora non rexistraba ningún caso.
Con iso, as residencias con máis usuarios afectados seguen sendo a DomusVi Lugo, de Outeiro de Rei, con 133 usuarios positivos, a residencia do Incio, con 58, e o fogar residencial O Piñeiral de Culleredo, con 21. As tres foron intervidas pola Xunta.
Do mesmo xeito, tamén teñen usuarios contaxiados a residencia Ballesol de Oleiros (7), a residencia As Salinas de Ourense (7), a Orpea Coruña de Culleredo (2) e a DomusVi Lalín (2). Pola súa banda, a residencia de Arteixo, a de Castro Ribeiras do Lea e o centro O Pilar teñen un usuario afectado cada unha.
TRABALLADORES DE RESIDENCIAS
En canto aos traballadores de residencias de maiores afectados, o parte deste martes informa da curación dun empregado da DomusVi Lalín e dous novos positivos de tres traballadores das Salinas, un da Bellavista Care de Nigrán e outro da residencia de maiores Santa Marta de Vigo.
Con iso, son 101 os traballadores positivos por COVID-19 neste tipo de centros. Os máis afectados, como en xornadas anteriores, son a residencia do Incio, con 35 empregados con PCR positiva, e a DomusVi Lugo, de Outeiro de Rei, con 24. Ademais, hai sete traballadores contaxiados no fogar residencial O Piñeiral de Culleredo e tres na residencia As Salinas de Ourense.
A estes súmanse dous casos na residencia Ballesol de Oleiros, outros dous na DomusVi Lalín e outros tantos no centro de Volta do Castro, en Santiago, a mesma cifra que a residencia San Simón de Teo, a residencia Vitoria de Teo, a residencia Nosa Señora do Socorro de Arnoia, DoralResidencias de Mos, CRAPD Vigo I e Residencia Santa Marta de Vigo.
Finalmente, rexistran un traballador afectado as seguintes residencias: Oleiros, DomusVi Noia, Porta do Camiño de Santiago, A Milagrosa de Lugo, San Bartolomeu de Xove, A nosa Señora da Saúde da Peroxa, A Saleta de Cea, DomusVi Barra de Miño de Coles, Santiago Apóstolo de Vilamarín, Vilar de Barrio, Campolongo, Bellavista Care de Nigrán, CRAPD Vigo II e residencia xeriátrica Albi-Beade.
CENTROS DE DISCAPACIDADE
En canto aos centros de discapacidade, mantéñense en 38 os contagios entre os seus usuarios: un na Residencia de Adultos Pai Menni de Betanzos (A Coruña) e 37 na residencia Ricardo Baró de Aspronaga, en Oleiros (A Coruña).
Tamén hai 15 traballadores con COVID-19 en diferentes centros, tras sumar un novo positivo no CAPD A Coruña e restar, por negativo, un caso no centro A Baña da Estrada.
En concreto, o centro con máis casos entre os seus traballadores continúa sendo o Ricardo Baró de Aspronaga, en Oleiros, con 11. Teñen un traballador afectado, ademais, a residencia Juan Vidán Torres de Santiago, a residencia de atención a persoas con dano cerebral de Castro de Rei, a residencia de Chapela-Redondela e o CAPD da Coruña.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.