Por E.P. | Santiago de Compostela | 22/09/2020 | Actualizada ás 17:51
A conselleira de Medio Ambiente, Anxos Vázquez, e o reitor da Universidade de Santiago de Compostela (USC), Antonio López, asinaron un convenio de colaboración para reintroducir e mellorar a situación do mexillón de río nos cursos fluviais galegos.
O convenio, autorizado polo Consello da Xunta este mesmo mes, garante a continuidade de colaboración entre a Consellería de Medio Ambiente e a universidade compostelá ata o ano 2023 e implica un importe de 85.000 euros para levar a cabo traballos de investigación encamiñados a desenvolver e mellorar o proceso de cultivo do mexillón de río (Margaritifera margaritífera).
Ademais, en base a este acordo, Medio Ambiente autoriza á Universidade de Santiago a empregar as instalacións do Centro ictioxénico do Veral, en Lugo, para levar a cabo estes traballos de investigación.
Segundo informou a Xunta, esta especie está a sufrir "unha regresión en toda a súa área de distribución" de forma paralela á degradación ambiental das bacías hidrográficas, mentres que en Galicia "ten un dos seus últimos refuxios en Europa" grazas a que as actividades agrogandeiras tradicionais permitiron "manter unha idónea calidade das augas".
O mexillón de río é "unha das especies máis ameazadas en Europa", destaca a Administración galega, polo que a recuperación das súas poboacións permitiría no futuro "unha importante mellora na calidade das augas, xa que actúan como filtradores biolóxicos naturais".
En virtude do convenio autorizado, a Universidade de Santiago prestará asesoramento e apoio técnico no cultivo de bivalvos de auga doce e para garantir o estado sanitario e xenético dos peixes que se utilizan como hospedadores das larvas dos mexillóns, á vez que elaborará os informes e documentos técnicos en relación coa conservación do mexillón de río e do seu cultivo, co fin de reforzar as súas poboacións ou traslocar a especie naqueles tramos fluviais nos que se considere posible a implantación de poboacións viables.
Con iso, a USC comprométese a dirixir e supervisar o desenvolvemento de técnicas de cultivo de bivalvos de auga doce coa finalidade de mellorar a produción e a recuperación das especies que se atopan baixo algunha figura de protección, xa sexa de ámbito internacional, nacional ou autonómico.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.