Afundimento histórico do turismo en agosto en Galicia
As pernoctacións hoteleiras afúndense un 40,8% en agosto en Galicia e a ocupación baixa 23 puntos, ao 44,6%.
Por Europa Press / Redacción | Santiago de Compostela | 23/09/2020 | Actualizada ás 10:13
As pernoctacións en establecementos hoteleiros baixaron un 40,79% en agosto en Galicia en relación co mesmo mes de 2019, ata situar o total en 924.618, segundo os datos que publica este mércores o Instituto Nacional de Estatística (INE).
O groso destas pernoctacións foron realizadas por residentes en España, 842.865 (91,16% do total), mentres que os 81.754 restantes correspondéronse con estranxeiros (8,84%).
Mentres, o grao de ocupación por prazas reduciuse case 23 puntos, do 67,4% de hai un ano ata o 44,63% no oitavo mes de 2020. Os viaxeiros pasaron de 660.807 a 401.345, isto é, caeron un 39,26%.
Pola súa banda, o índice de prezos hoteleiros rexistrou unha diminución do 5,52% na comunidade, a tarifa media diaria (70,74 euros) retrocedeu un 0,65% e os ingresos por habitación dispoñible (32,13 euros) foron uns 33,87% inferiores aos de agosto de 2019.
SEXTO MES DE CAÍDAS
No conxunto estatal, as pernoctacións en establecementos hoteleiros esborralláronse máis que en Galicia, un 64,3% en agosto respecto ao mesmo mes do ano anterior, ata sumar 16,8 millóns, a pesar da apertura de fronteiras tras a finalización a finais de xuño do estado de alarma.
