O número de hospitalizados por COVID descende a 231 e tamén baixa a 34 o número de pacientes en UCI
En total, o número desdence en cinco persoas con respecto o pasado sábado e unha menos no tocante á UCI.
Por Europa Press / Redacción | SANTIAGO DE COMPOSTELA | 27/09/2020 | Actualizada ás 14:20
Os pacientes con COVID-19 hospitalizados en Galicia baixaron en dez nas últimas 24 horas, ata os 231 en total, cinco menos que o sábado. Tamén descenden as persoas diagnosticadas con coronavirus nas unidades de coidados intensivos (UCI), que se sitúan en 34, unha menos que hai 24 horas.
Segundo os datos facilitados polas áreas sanitarias galegas, na da Coruña e Cee hai este domingo 57 pacientes ingresados --os mesmos que fai unha xornada--. Deles, o Chuac acumula 45 en planta e seis en UCI; o Modelo, dous en planta e un en UCI; e o Hospital de Cee, tres en planta.
Na área de Vigo, soben en dúas, a 18, as persoas con COVID hospitalizadas --un en Fátima, catro en Povisa e 13 no Álvaro Cunqueiro--, mentres que continúan tres na UCI deste último hospital.
A área de Santiago e Barbanza conta con 35 hospitalizados --un máis--, dos cales 34 están no Hospital Clínico --seis en unidade de críticos-- e outros no HM Rosaleda, ambos na capital galega.
En Lugo, hai un total de 39 persoas hospitalizadas --baixan en seis--, dos cales sete están na UCI do Hospital Lucus Augusti (HULA). Dos 32 que se atopan en planta, 28 están no HULA e catro no Polusa, mentres que os hospitais da Mariña e Monforte de Lemos non contan con pacientes con COVID.
Así mesmo, na área sanitaria de Pontevedra-O Salnés mantéñense en 19 as persoas hospitalizadas. Destas, hai cinco na UCI do Hospital Montecelo e 14 en planta --once no CHOP, un no Miguel Domínguez e outros dous no do Salnés--.
Na área de Ourense, hai 56 ingresados, tres máis que o sábado: 38 no complexo hospitalario da capital provincial --cinco deles en UCI--, oito no comarcal de Verín e cinco no do Barco de Valdeorras.
Finalmente, a área de Ferrol conta con sete pacientes con COVID-19 hospitalizados e volve converterse na única área sanitaria de Galicia que carece de pacientes en coidados intensivos tras subir a planta a persoa que permanecía en UCI o sábado.
