O BNG pide que se activen todas as accións xudiciais para recuperar a Casa Cornide

Representantes do BNG pediron que se activen todas as accións xudiciais para recuperar a Casa Cornide. Ademais, nunha comparecencia ante o inmoble, anunciaron a presentación dunha iniciativa no pleno do xoves para testemuñar "a solidariedade" co colectivo '9 da Casa Cornide' que será xulgado o próximo 14 de outubro.

Este grupo de activistas foi denunciado pola familia Franco por despregar unha pancarta sobre o balcón dun edificio que "en tempos foi a sede do Concello da Coruña", remarcan desde a formación nacionalista.

A iniciativa, anunciada polo portavoz do BNG, Francisco Jorquera, é unha das cuestións que se inclúen nunha moción que parte da Comisión en Defensa do Común, de varias asociacións veciñais e colectivos, así como distintas formacións políticas.

Ao encontro asistiron varias das persoas integrantes dos '9 da Casa Cornide', entre eles a súa portavoz, Elvira Branco, así como a deputada no Parlamento galego, Mercedes Queixas e o propio Jorquera.

"Faremos forza para que se axilice canto antes a declaración da Casa Cornide como Ben de Interese Cultural", apuntou a deputada, avanzando que levarán este asunto ao Parlamento galego.

"Que delito cometeron os '9 da Casa Cornide'?", preguntou, á súa vez, Francisco Jorquera. "Os demandantes son a familia Franco, é dicir, os expoliadores". Por iso, avanzou que desenvolverán unha campaña de apoio aos integrantes deste colectivo que culminará o día 14 cunha concentración ante o xulgado.

Ademais, avanzou que a iniciativa do xoves expón o obxectivo de que a Casa Cornide se declare BIC e se executen accións xudiciais para garantir o retorno do edificio ao patrimonio público.

"Urxe facelo canto antes, sabemos que os Franco queren blindar o saqueo, puxeron en venda a Casa Cornide en pleno xuízo do Pazo Meirás para perpetuar este saqueo", sentenciou. "A nosa loita é unha loita pola memoria democrática", manifestou, mentres, Elvira Branco.