Por Galicia Confidencial | Ourense | 30/09/2020 | Actualizada ás 11:58
Expertos do Foro Económico de Galicia recomendan priorizar a explotación do monte fronte aos dereitos de propiedade. E, para iso, suliñan que sería imprescindible unha reforma estrutural na xestión das terras e a posta en marcha dun novo modelo de explotación con usos
diversos.Así o puxeron de manifesto nun documento presentado este mércores en Ourense.
Edelmiro López, membro nato do Foro Económico de Galicia, destacou, durante a presentación, que é preciso "construír un aproveitamento diversificado, multifuncional, das terras de monte". O informe ten a súa orixe na IV reunión anual do Foro Casal de Armán e está coordinado polos profesores Edelmiro López e Albino Prada.
Segundo os autores nese aproveitamento teñen que ter cabida usos moi diversos: produción de madeira de especies de crecemento rápido, madeiras de calidade, gandería extensiva, biomasa e outras fontes de enerxía renovable, funcións ambientais e espazo de lecer. "Tendo en conta as deficiencias que presenta a xestión das terras de monte, resulta imprescindible unha reforma estrutural", apuntan pero que non altere a estrutura da propiedade e que impulse a mobilización produtiva e un adecuado aproveitamento destas superficies.
Entre as medidas propostas están uha ordenación efectiva dos usos do solo, a configuración dun novo equilibrio entre propietarios e usuarios das terras, a "coherencia" das distintas políticas públicas, corrixindo a fragmentación e contradicións entre políticas sectoriais e que a mellora das terras de monte sexan protagonizadas pola iniciativa privada pero acompañado dunha xestión pública directa de determinadas superficies.
PROBLEMAS DOS LUMES
Neste sentido, consideran que o modelo existente en Galicia non é o máis axeitado pola especialización produtiva e espacial o que, din, "provoca importantes limitacións". Entre elas, citan a forte dependencia dun número moi reducido de consumidores finais, a competencia doutras áreas do mundo, os problemas sanitarios e de adaptación ao cambio climático, a concentración das rendas na parte do territorio menos afectada polo despoboamento e a dificultade para xestionar unha biomasa que ameaza con aumentar os riscos de incendios.
Por iso, insisten, é importante a participación das administracións públicas para impulsar un modelo alternativo, aínda que tamén recoñecen que a fragmentación da propiedade é un obstáculo para por en marcha este novo modelo. Como solución os expertos apostan por instrumentos legais que permitan xestionar o uso de monte sen que a propiedade individual poida supoñer un bloqueo. O documento pódese consultar en https://www.foroeconomicodegalicia.es/publicacions.html
Entre as medidas propostas están uha ordenación efectiva dos usos do solo, a configuración dun novo equilibrio entre propietarios e usuarios das terras, a "coherencia" das distintas políticas públicas, corrixindo a fragmentación e contradicións entre políticas sectoriais e que a mellora das terras de monte sexan protagonizadas pola iniciativa privada pero acompañado dunha xestión pública directa de determinadas superficies.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.