O número de casos ingresados nos órganos xudiciais galegos baixaron un 34,6% no segundo trimestre do ano

Os órganos xudiciais galegos ingresaron no segundo trimestredel ano 56.113 asuntos, fronte aos 85.862 de 2019 no mesmo período, o que representa unha diminución do 34,6 %, segundo o informe sobre a situación dos xulgados e tribunais feito público pola Sección de Estatística do Consello Xeral do Poder Xudicial.

Tanto a entrada como a resolución de procedementos experimentaron un descenso en todas as xurisdicións debido á incidencia da crise sanitaria da COVID-19 no desenvolvemento da actividade xudicial. "Ademais, hai que ter en conta que o período analizado, entre o 1 de abril e o 30 de xuño, foi o máis afectado pola declaración do estado de alarma", precisa o Tribunal Superior de Xustiza de Galicia (TSXG).

Desta forma, ao finalizar o segundo trimestre do ano, quedaronpendientes en Galicia 166.276 casos, un 10,4% máis que na mesma data do ano anterior, cando estaban en trámite 150.978. Nos órganos xudiciais da Comunidade resolvéronse entre abril e xuño 43.233 procedementos, fronte aos 88.163 que se finalizaron en 2019 no mesmo período, o que significa un descenso interanual do 51 %.

DESCENSO DA LITIXIOSIDADE

A taxa de litixiosidade en Galicia (20,8 no segundo trimestre de 2020) descendeu once puntos con respecto ao ano pasado no mesmo período, que era de 31,9. A taxa da Comunidade está por baixo da media do Estado, que foi de 22,3 asuntos por cada mil habitantes.

Na xurisdición civil, o número de procedementos ingresados en Galicia no segundo trimestre do ano foi de 26.156, o que supón un descenso do 26,9 % respecto ao mesmo período do ano anterior. Nese tempo resolvéronse 16.492 asuntos, un 54,4 % menos que en 2019, quedando en trámite ao final de xuño 89.609, un 14,3 % máis.

Na xurisdición penal entraron 23.263 asuntos, 161,55 de media por órgano xudicial, é dicir, un 39,8 % menos que no segundo trimestre de 2019. O número de casos resoltos foi 21.255; e o de asuntos en trámite ao final do período, 41.409, un 4,7 % máis que o ano pasado.

Na xurisdición contencioso-administrativa rexistráronse 1.186 casos entre os pasados 1 de abril e 30 de xuño, o que supón un 52,3 % menos que no mesmo período do ano anterior. Resolvéronse 1.462 asuntos, un 45,7% menos, e quedaron en trámite 6.905, un 1,3% menos que no segundo trimestre de 2019.

Por último, a xurisdición social tamén experimentou un descenso na entrada de procedementos, xa que os 5.508 ingresados representan un 38,3 % menos que no mesmo período de 2019. O número de asuntos resoltos nesta xurisdición foi 4.024, un 54,6 % menos, e quedaron en trámite ao final de xuño 28.353, un 10,3 % máis.

POR PROVINCIAS

Entre os pasados 1 de abril e 30 de xuño na provincia da Coruña rexistráronse 20.802 asuntos e resolvéronse 14.595, un 53,4% menos que no mesmo período de 2019. En Pontevedra recibíronse 19.517 casos e finalizáronse 14.956 (un 52,1 % menos).

Na provincia de Lugo ingresáronse 6.154 procedementos, dos que se resolveron 4.831 (un 47,8 % menos), fronte aos 5.813 que se recibiron na provincia de Ourense, dos que se finalizaron 4.298, un 54,1 % menos.

A Coruña e Pontevedra tiñan en trámite ao comezo do segundo trimestre deste ano 63.092 e 50.897 asuntos, respectivamente, e, ao finalizalo, quedaron pendentes na Coruña 69.172 (un 11,6 % máis que en 2019) e, en Pontevedra, 54.795 (12,3 % máis que o ano pasado).

Os xulgados de Lugo iniciaron o período con 19.151 casos sen resolver e finalizárono con 20.352, é dicir, un 8,8 % máis que o ano pasado nas mesmas datas. A provincia de Ourense tiña en trámite ao comezo do segundo trimestre 13.490 asuntos, fronte aos 14.970 do 30 de xuño, é dicir, un 8,8 % máis con respecto ao final do segundo trimestre do ano pasado.

Sede TSXG. EUROPA PRESS - Arquivo