Por Europa Press / Redacción | SANTIAGO DE COMPOSTELA | 04/10/2020 | Actualizada ás 18:31
A Policía Local da Coruña interveu na madrugada do domingo un local da rúa Socorro no que se atopaban "numerosas" persoas no seu interior, ao que os axentes accederon despois de forzar a fechadura.
Segundo informa o concello herculino, a policía recibiu o aviso dunha testemuña que afirmaba que no negocio, que se atopaba coas portas pechadas, "había moita xente". Ademais, outra persoa chamou á Policía Local para requirir a súa presenza, pois afirmaba que no interior do local estaba unha amiga súa á que non deixaban abandonar o negocio.
Desprazados ao lugar, os axentes tiveron que forzar a fechadura para acceder ao interior da sala principal, onde identificaron a todos os presentes.
Segundo o relato da policía, varias persoas aseguraron que se atopaban retidas en contra da súa vontade, algo que foi negado polo dono do establecemento, de 39 anos de idade, que afirmou que se trataba dunha festa de aniversario.
Os axentes formularon denuncias contra o propietario do establecemento por exceso horario, por impedir a inspección do local e, ademais, por ter unha cámara de gravación apuntando cara ao exterior sen contar coa autorización pertinente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.