Feijóo di estar "preocupado" pola situación da industria naval en Ferrol

O presidente da Xunta, Alberto Núñez Feijóo, reunirase proximamente co alcalde de Ferrol, Ángel Mato (PSOE), para abordar a situación da cidade, que lle "preocupa".
"A situación de Ferrol non é nada fácil, a situación económica, a situación da construción naval, de forma máis particular, unha situación que preocupa e preocúpanos, tanto á Alcaldía como ao Goberno da Xunta, sobre todo pola situación das compañías auxiliares, do estaleiro público e de toda a economía da comarca de Ferrolterra", asegura Núñez Feijóo.

Ditas manifestacións realizounas o titular do Executivo galego en Ferrol, na mañá deste luns durante unha visita realizada ás instalacións da Cociña Económica, que foron obxecto dunha reforma nos últimos meses. Alí, estivo acompañado pola conselleira de Política Social, Fabiola García, e o alcalde desta cidade, Ángel Mato (PSOE).

Feijóo explicou que a finais da semana pasada recibiu unha carta do rexedor ferrolán para abordar algúns asuntos, polo que ese encontro será "de forma inmediata".

"Espero poder sentarme nos próximos días co alcalde de Ferrol para priorizar as cuestións máis importantes desta lexislatura, onde o máis urxente e importante é pór data e parametrizar o traballo que non temos e que cada vez escasea máis no estaleiro público de Ferrol, xa que esta é unha cidade na que se o sector naval non funciona, a cidade non pode funcionar", apunta.