Feijóo abre a porta a que as restriccións en Ourense se prolonguen durante "semanas ou meses"
Pide "compromiso individual" para reducir ao máximo reunións de amigos e familiares.
Por Europa Press / Redacción | SANTIAGO DE COMPOSTELA | 08/10/2020 | Actualizada ás 17:06
O presidente da Xunta, Alberto Núñez Feijóo, apelou ao "compromiso individual" dos ourensáns para facer fronte á covid-19 e evitar "un problema colectivo" e advertiu de que os "brotes máis complexos" son os vinculados ás reunións de amigos e familiares.
"Sen compromiso individual estamos destinados a ter un problema colectivo", avisou na rolda de prensa posterior á reunión semanal do seu goberno, unha comparecencia na que lembrou que a taxa de positividade por cada 100.000 habitantes en Ourense supera os 400 puntos, cando Galicia ten 102. Ademais, indicou que a de PCR positivas é do 18% fronte á media galega do 3,2%.
Ante iso, considerou necesario "seguir traballando" e agradeceu aos veciños que entendan que o obxectivo é que as restricións adoptadas pola Xunta para combater o virus na zona sexan temporais e "non de semanas ou meses como pode ocorrer" no caso de que non se consiga diminuír o impacto da infección en Ourense, no concello limítrofe de Barbadás, así como noutras zonas da provincia con restricións activas.
Neste punto, apelou ao "compromiso individual" e sinalou que "cando un brote afecta a unha empresa ou a unha instalación na que traballa moita xente rapidamente pódese" parametizar. Con todo, asegurou que cando os contagios están vinculados a reunións familiares ou de amigos "é moito máis difícil combatelos" ao afectar a "poucas persoas que teñen capacidade de infectar a moitas".
"Imos ver se entre todos somos capaces de diminuír e darnos conta de que o feito da familiaridade ou da amizade non o entende o virus", indicou Feijóo, que volveu a reivindicar o uso das máscaras, a distancia de seguridade e o uso de espazos exteriores.
Deste xeito, fixo un chamamento á responsabilidade para que Galicia "siga sendo un dos lugares máis seguros". E é que, conforme indicou, a situación na UCI e nos hospitais galegos "é a menos mala de toda España".
