O BNG insta o Estado a rebaixar o IVE de todas as actividades e bens culturais ao 4%

O BNG, a través do seu deputado no Congreso, Néstor Rego, insta o Goberno estatal a rebaixar o IVE a todas as actividades e bens culturais de modo que se lle aplique o tipo superreducido: o 4 por cento. Entre outros, os nacionalistas citan bibliotecas, arquivos, museos, galerías de arte, cinemas, teatros, circos e concertos, pero propoñen que se exclúa á tauromaquia porque "a tortura nunca pode ser cultura".

O Bloque asevera que a crise causada pola pandemia do coronavirus provoca "graves efectos de carácter laboral, económico e social, tamén no sector cultural", o que mostra "unha vez máis a precaria situación na que se atopan moitos e moitas creadoras e artistas".

Por iso, o BNG lembra que Rego presentou "diversas emendas" ao proxecto de lei polo que se aproban medidas de apoio ao sector cultural e de carácter tributario para facer fronte ao impacto da COVID-19.

Neste contexto, o deputado nacionalista reclamou "ampliar o perfil das e dos artistas" ás que van destinadas estas axudas, posto que os creadores "van máis aló dos espectáculos que se realizan en vivo". E é que, segundo Rego, o proxecto de lei "limita a uns poucos artistas" o acceso a estes apoios.

Paralelo a iso, o BNG considera "necesario" facilitar o acceso ás liñas de crédito e financiamento "non só a empresas que buscan un beneficio económico, senón tamén a entidades, asociacións ou cooperativas sen ánimo de lucro", xa que en Galicia son "moitos" os proxectos culturais organizados por estes colectivos.