Por Europa Press / Redacción | SANTIAGO DE COMPOSTELA | 14/10/2020 | Actualizada ás 14:46
Os grupos parlamentarios do Pazo do Hórreo, así como o seu presidente, Miguel Ángel Santalices, sumáronse este mércores á campaña de vacinación contra a gripe, que iniciou a súa fase para a poboación xeral o luns despois dunha primeira semana orientada aos profesionais da sanidade.
"Se hai vacina, aproveitémola". Así convidou a vacinarse á cidadanía o conselleiro de Sanidade, Julio García Comesaña, que destacou a existencia de "uns números razoablemente importantes de demanda" nos primeiros días da campaña.
O titular de Sanidade compareceu ante os medios xunto ao xefe do Lexislativo galego despois de que este e representantes dos grupos parlamentarios --PP, BNG e PSOE-- recibisen a vacina.
García Comesaña mostrou a súa satisfacción por celebrar o lanzamento da campaña desde "un sitio tan emblemático" como o Parlamento de Galicia, polo que apelou a que os cidadáns "tomen exemplo dos seus representantes" nun ano no que "hai que concienciar máis se cabe" sobre a importancia da vacinación.
Neste sentido, sinalou que o Servizo Galego de Saúde traballa xa en agendar as citas solicitadas nos primeiros días da campaña, na que terán prioridade a "poboación diana".
SANTALICES
Pola súa banda, Santalices tamén destacou a relevancia de que este ano a porcentaxe de vacinados sexa elevado ante a previsible coincidencia durante os próximos meses das dúas patoloxías: a gripe común e o coronavirus.
"Se estamos vacinados, o risco de ter que ir ao hospital vai ser menor", incidiu o xefe do Lexislativo autonómico, que agradeceu á Consellería de Sanidade o xesto de acudir á Cámara para reforzar a mensaxe da campaña.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.